Arranca a primeira Liga de Pádel de Oza Cesuras con inscrición gratuíta
A afección polo pádel terá unha nova cita deportiva coa posta en marcha da primeira Liga de Pádel de Oza Cesuras 2026, unha competición que nace coa intención de reunir xogadores e xogadoras do municipio e doutros puntos da contorna.
A inscrición é gratuíta e está aberta a parellas masculinas, femininas e mixtas, sen importar o nivel dos participantes. A organización establecerá os grupos e categorías en función do nivel de xogo para favorecer que os encontros sexan o máis equilibrados posible.
Un dos requisitos para participar é que polo menos unha das persoas integrantes da parella estea empadroada en Oza Cesuras. O prazo para formalizar a inscrición permanecerá aberto ata o 16 de outubro.
As persoas interesadas poden solicitar información ou apuntarse a través de WhatsApp no número 665 076 136. A iniciativa está impulsada por unha persoa veciña do municipio coa colaboración do Concello.
A creación desta liga chega nun momento de impulso das instalacións deportivas dedicadas a esta disciplina. O municipio conta actualmente con tres pistas públicas de pádel e unha de tenis, ademais dun sistema de reserva de prazas para facilitar o uso das instalacións.
Entre as actuacións realizadas recentemente figura tamén a mellora das instalacións deportivas de O Loureiro, na parroquia de Salto, onde se promoveu a creación dunha pista de pádel cun investimento previsto de máis de 48.000 euros.
Coa nova competición, o obxectivo pasa agora por converter estas instalacións nun punto de encontro habitual para os afeccionados ao pádel e fomentar a práctica deportiva entre persoas de diferentes idades e niveis.