Antón Tenreiro asumirá a acta do BNG no último ano do mandato en Betanzos
O BNG de Betanzos anunciou a incorporación de Antón Tenreiro ao seu grupo municipal. O novo concelleiro substituirá a Salvador González, que deixa a corporación por cuestións persoais e sindicais, segundo trasladou a formación nacionalista.
Tenreiro, veciño de Infesta e integrante desde hai uns meses do Consello Local do BNG, asumirá a responsabilidade no último ano do mandato municipal. A organización sinala que esta incorporación busca reforzar o traballo do grupo de cara á recta final do período 2023-2027.
O futuro concelleiro afirmou que afronta esta etapa 'con responsabilidade, con seriedade e con ganas de traballar en positivo polo ben dos veciños e veciñas'. Tamén indicou que continuará na liña de traballo desenvolvida polo BNG durante os últimos anos no Concello.
A formación nacionalista pretende intensificar nos próximos meses o contacto co tecido social de Betanzos. Tenreiro avanzou que o obxectivo será achegarse ás asociacións, aos clubs e á veciñanza para recoller propostas e reforzar a presenza do grupo municipal na vida local.
O BNG agarda agora que a toma de posesión da acta poida producirse o antes posible, unha vez completados os trámites correspondentes tras a saída de Salvador González.