Andrea Boedo volve facer historia e suma dous metais no Campionato de España
Andrea Boedo continúa facendo sitio entre as grandes do patinaxe de velocidade nacional. A deportista de Sada pechou cun dobrete de medallas a súa participación no Campionato de España de categoría sénior, celebrado esta fin de semana en Málaga.
A patinadora galega volveu demostrar o seu excelente momento de forma ao subir ao máis alto do podio nos 100 metros sprint, unha proba na que xa se proclamara campioa de España nos dous anos anteriores.
Boedo conseguiu así o seu terceiro título estatal consecutivo nesta distancia, confirmando o seu dominio nunha das probas máis explosivas do patinaxe de velocidade. A sadense parou o cronómetro en 11,091 segundos, unha marca que lle permitiu facerse coa medalla de ouro.
Pero a súa actuación en Málaga non rematou aí. A deportista tamén conseguiu subir ao podio nos 300 metros sprint, onde asinou unha destacada terceira posición nunha final moi igualada. Deste xeito, Andrea Boedo regresou do Campionato de España con dúas medallas, un ouro e un bronce, ampliando un palmarés que continúa medrando competición tras competición.
A deportista de Soñeiro, vinculada ao Rabadeira, mantén así unha traxectoria ascendente no patinaxe de velocidade e volve situarse como unha das referencias nacionais da súa categoría. O novo éxito chega ademais despois doutras boas actuacións ao longo da tempada, nun ano no que Boedo xa conseguiu destacar tamén en competicións internacionais.
Co terceiro campionato de España consecutivo nos 100 metros sprint e un novo metal nos 300, a patinadora sadense suma outro capítulo destacado á súa carreira e confirma que segue a competir ao máximo nivel.