Alternativa move ficha para abrir os locais sociais ao uso veciñal en Cambre
Alternativa deu un novo paso para que os locais sociais municipais de Cambre poidan empregarse tamén pola veciñanza en xeral e non só polas entidades. A formación rexistrou unha relación de ordenanzas doutros concellos e un borrador de modificación da normativa local co obxectivo de incorporar un servizo de cesión de uso que permita reservar estes espazos para actividades, reunións familiares, aniversarios ou encontros veciñais.
O movemento chega, segundo o grupo, tras meses sen novidades sobre a proposta aprobada por unanimidade no pleno, na que se acordaba poñer en marcha un servizo para facilitar o uso de espazos municipais pola cidadanía. Esa liña xa fora avanzada en novembro, cando se informou de que o Concello prevía activar en 2026 un sistema de préstamo de locais municipais para uso veciñal.
Xunto coa reforma normativa, Alternativa solicitou tamén que se actualicen as concesións anuais dos locais sociais xa asignados, ao considerar que ese paso permitirá coñecer con maior precisión a situación real das instalacións e o seu nivel de uso antes de redactar a nova ordenanza. A norma vixente, publicada no BOP en 2003, regula a cesión de edificios, locais e instalacións municipais a asociacións veciñais, distingue entre usos puntuais, temporais e anuais, e fixa para estes últimos a presentación dunha memoria de actividades en decembro, ademais de informes sobre o estado das instalacións.
Desde Alternativa sosteñen que a apertura destes espazos daría resposta a unha demanda veciñal e permitiría ampliar os modelos de participación máis alá do asociacionismo tradicional. Ao seu xuízo, a medida tamén contribuiría a optimizar mellor os recursos públicos e a democratizar o acceso ás instalacións municipais. Cambre conta cunha ampla rede de locais sociais distribuídos por distintas parroquias e núcleos do municipio, segundo a relación publicada polo propio Concello.
O debate chega ademais nun contexto no que a xestión dos espazos municipais e do tecido asociativo leva meses no foco político e informativo. O pasado outono, o goberno local informou da adxudicación de dous locais sociais e do avance na regularización de sedes asociativas, mentres Alternativa tamén puxo o acento na necesidade de desbloquear as subvencións pendentes para as entidades do municipio.