Alternativa Enxebre cuestiona a situación administrativa da granxa porcina de Lañas
Alternativa Enxebre reclama explicacións ao Concello de Arteixo sobre a situación administrativa dunha explotación porcina situada na Ermida, na parroquia de Lañas, e anuncia que trasladará o caso á Fiscalía unha vez recompilada e ordenada a documentación municipal.
A formación basea as súas preguntas nas declaracións realizadas no último Pleno polo concelleiro de Urbanismo, Alberto Castro, quen, segundo Alternativa Enxebre, recoñeceu que a explotación non dispón de licenza de actividade nin de comunicación previa. A concelleira Noelia Martínez Canosa pide coñecer agora con que título habilitante leva funcionando a granxa e desde cando.
Martínez cuestiona tamén que, segundo sinala a formación, o Concello autorizase recentemente obras ou melloras nas instalacións, que aínda estarían en execución. “O propio concelleiro de Urbanismo recoñeceu no último Pleno que a explotación non ten licenza de actividade nin comunicación previa. Agora queremos saber con que título se permitiu funcionar durante todos estes anos e como se tramitou o cambio de titularidade cando a granxa foi arrendada”, afirma.
Alternativa Enxebre sinala que a explotación leva anos arrendada a unha persoa diferente da propietaria e reclama coñecer que documentación figura no Concello sobre ese cambio de titularidade. A formación cita a Lei 9/2013 e o Decreto 144/2016 para preguntar se o cambio foi comunicado á Administración municipal e que título habilitante inicial se fixo constar no trámite.
“A pregunta é inevitable: se o propio concelleiro afirma que non existe licenza de actividade nin comunicación previa, que título habilitante inicial se fixo constar cando cambiou a persoa que explota a granxa? Comunicouse ese cambio ao Concello? E, se non se comunicou, quen figura oficialmente como titular da actividade?”, pregunta Martínez.
A concelleira lembra ademais que leva anos trasladando, xunto coa veciñanza, queixas relacionadas cos puríns, os cheiros, a proliferación de insectos e o estado das instalacións. Segundo Alternativa Enxebre, Martínez solicitou formalmente o acceso aos expedientes municipais o pasado 17 de agosto, pero continúa sen dispoñer desa documentación.
A formación compara tamén a situación coa actuación municipal realizada en 2021 respecto da empresa de materiais de construción Pombo. Segundo a información publicada por La Opinión A Coruña e citada por Alternativa Enxebre, o Concello comprobou daquela que a actividade carecía de licenza, realizou comprobacións policiais e técnicas e acordou a súa suspensión inmediata como medida cautelar, nunha resolución asinada polo propio Alberto Castro.
“Queremos saber que diferenzas administrativas ou xurídicas existen entre ambos os casos. En 2021, Alberto Castro asinou unha suspensión inmediata ante unha actividade sen licenza. En 2026, recoñece no Pleno que a granxa de Lañas non ten licenza de actividade nin comunicación previa e, porén, continúa funcionando. O Concello ten que explicar documentalmente por que a súa actuación é diferente”, sinala Martínez.
Alternativa Enxebre lembra igualmente que a falta de acceso á documentación municipal levou a Noelia Martínez a presentar unha queixa ante a Valedora do Pobo, que foi admitida a trámite e deu lugar a un requirimento de información e dun informe ao Concello de Arteixo.
A formación considera necesario coñecer os expedientes, informes técnicos, inspeccións, autorizacións de obras e melloras, antecedentes administrativos e documentación relacionada coa titularidade da explotación.
Unha vez recompilada e ordenada esta información, Alternativa Enxebre anuncia que trasladará os feitos á Fiscalía para que determine se das actuacións realizadas ou omitidas poden derivarse responsabilidades penais.
“Poremos en coñecemento da Fiscalía toda a documentación relativa ás actuacións do alcalde, Carlos Calvelo; do concelleiro de Urbanismo, Alberto Castro; e dos técnicos municipais que interviñesen nos expedientes, informes ou autorizacións relacionados coa explotación. Será a Fiscalía a que determine se existe ou non responsabilidade penal”, manifesta Martínez.
A concelleira conclúe reclamando que se esclareza a situación administrativa da explotación e o tratamento dado polo Concello ao expediente. “O que estamos esixindo é algo tan básico como que a lei se aplique por igual a todos. Queremos os expedientes, queremos explicacións e queremos saber por que se permitiu chegar ata aquí. E se existen actuacións que poidan ter relevancia penal, poremos toda a documentación en mans da Fiscalía para que se investiguen e se determinen as responsabilidades que correspondan”, afirma.