Alternativa dos Veciños de Carral esixe rematar coas incidencias eléctricas en Taramuño
Alternativa dos Veciños de Carral presentou un escrito dirixido a UFD Distribución Electricidad, S.A., do Grupo Naturgy, no que solicita unha actuación urxente para solucionar os problemas recorrentes na subministración eléctrica que, segundo denuncia, sofre a veciñanza de Taramuño, na parroquia de San Vicente de Vigo.
A formación explica que os residentes levan anos padecendo incidencias na rede eléctrica, unha situación que, segundo os propios afectados, se intensificou durante o último ano. Entre os problemas máis habituais figuran cortes de luz, baixadas e subidas de tensión e picos eléctricos, que mesmo chegan a repetirse varias veces nun mesmo día.
Segundo sinala Alternativa dos Veciños de Carral, estas deficiencias están a provocar importantes trastornos na vida diaria da veciñanza sen que, aseguran, UFD adoptase unha solución pese a coñecer a existencia desta problemática.
A formación destaca que as consecuencias son especialmente graves para as persoas maiores, dependentes e con discapacidade, xa que moitas delas precisan dunha subministración eléctrica continua para o funcionamento de camas articuladas, guindastres de mobilización, dispositivos médicos e outros equipamentos esenciais para garantir a súa seguridade e benestar.
As incidencias tamén repercuten noutras actividades cotiás, xa que dificultan a carga de vehículos eléctricos, afectan ao teletraballo e aos estudos, provocan avarías en electrodomésticos e outros aparellos eléctricos, ocasionan perdas de alimentos polos cortes de subministración e impiden desenvolver con normalidade distintas tarefas nos fogares.
No escrito rexistrado, Alternativa dos Veciños de Carral solicita que UFD realice unha inspección técnica urxente da rede que abastece Taramuño, leve a cabo medicións sobre a calidade da subministración, investigue a orixe das incidencias e adopte as medidas necesarias para garantir un servizo estable, seguro e de calidade.
Ademais, pide á compañía que informe por escrito das actuacións realizadas, das conclusións obtidas e das solucións previstas para resolver un problema que, segundo sostén a formación, leva anos afectando á veciñanza e que experimentou un notable agravamento durante o último ano.
Desde Alternativa dos Veciños de Carral consideran que “non pode seguir prolongándose no tempo nin poñer en risco a calidade de vida da veciñanza, especialmente das persoas máis vulnerables”, polo que confían en que UFD actúe coa máxima dilixencia para ofrecer unha solución definitiva