Alternativa denuncia un xiro na ampliación do CEIP Vicente Otero e acusa o PP de romper o acordo previo
A ampliación do CEIP Vicente Otero Válcarcel volve xerar controversia en Carral. Alternativa dos Veciños acusa o Goberno local do PP e a Xunta de abandonar os acordos acadados durante 2024 e comezos de 2025 para ampliar o centro e substituílos por un proxecto que, segundo a formación, non responde ás necesidades formuladas pola comunidade educativa.
A denuncia prodúcese coincidindo co inicio do curso escolar e despois de que a Xunta anunciase a finais de agosto un investimento de case 1,4 millóns de euros para ampliar as instalacións. O proxecto autonómico contempla seis novas aulas, unha reorganización dos comedores e a creación dun novo patio de xogos, aínda que a licitación non está prevista ata o primeiro trimestre de 2027 e o inicio das obras sitúase arredor do mes de xuño.
Desde Alternativa sosteñen que a actuación que se tiña formulado durante o anterior mandato municipal era diferente. Segundo explica a formación, aquela proposta incluía o derrubamento das antigas vivendas do profesorado, unha actuación que se pretendía financiar a partes iguais entre a Xunta e o Concello.
O obxectivo era aproveitar ese espazo para levantar un novo edificio destinado á biblioteca e a outros servizos educativos, ademais de ampliar o número de aulas de sete a oito e habilitar unha nova zona verde para xogos.
Críticas ao novo proxecto
Alternativa considera que a solución que finalmente se formulou supón un cambio respecto ao que se viña traballando coa dirección do centro e a ANPA. A formación asegura que o novo deseño reduce determinados espazos educativos, elimina unha zona exterior cuberta e modifica o uso dun dos comedores, ademais de non incorporar as novas zonas verdes e de xogo que, segundo a súa versión, estaban contempladas na alternativa anterior.
A formación tamén cuestiona que as obras non se impulsasen antes. En marzo xa reclamara explicacións sobre o estado dunha actuación que figuraba nas previsións orzamentarias da Xunta para 2026 cunha partida inicial de 800.000 euros. Naquel momento, Alternativa reclamaba coñecer o estado da tramitación e os prazos para redactar, licitar e executar a ampliación.
A situación evolucionou posteriormente. En abril, representantes do Concello, da dirección territorial de Educación e da comunidade educativa mantiveron unha reunión no propio colexio para estudar diferentes alternativas ante o incremento da matrícula. Entre as posibilidades analizadas estaba precisamente aproveitar o espazo das antigas vivendas do profesorado para reorganizar as instalacións e gañar novas aulas.
Un proxecto que chega despois de meses de reclamacións
A ampliación do Vicente Otero converteuse nunha reivindicación recorrente durante os últimos meses debido ao incremento do alumnado e á necesidade de dispoñer de máis espazos. A comunidade educativa xa advertía na primavera de que o colexio podía avanzar cara a un modelo de tres liñas, o que levou a reclamar unha solución estable e non unicamente medidas provisionais.
O novo proxecto da Xunta pretende responder a ese crecemento con seis aulas adicionais. A actuación prevé construír unha nova planta sobre o comedor para habilitar catro aulas de Primaria e crear outras dúas na planta baixa, ademais de reorganizar os comedores e habilitar un espazo de psicomotricidade. Tamén se contempla un novo patio de xogos e diferentes melloras nas instalacións.
Agora, Alternativa volve poñer o foco nas diferenzas entre a proposta que asegura que se acordara anteriormente e o proxecto que finalmente se executará. A formación reclama que se teñan en conta as necesidades trasladadas polas familias e pola dirección do centro e critica que a actuación definitiva se definise, ao seu xuízo, sen manter aquel consenso.