Política | Concello

O grupo municipal critica que o espazo de dinamización de persoas maiores apenas acolle clases de estimulación mental e reclama ao Concello de Culleredo un calendario claro para activar o servizo

O Centro Rural Dinamizador de persoas maiores de Celas volve situarse no foco político en Culleredo. Alternativa dos Veciños denunciou que a instalación continúa sen un uso efectivo e sen unha planificación definida, a pesar de que fora concibida para ofrecer servizo á veciñanza, principalmente das parroquias de Celas e Sésamo, e combater o illamento das persoas maiores no rural.

A formación levou esta situación ao pleno municipal e pediu explicacións sobre a previsión de funcionamento dun edificio do que, segundo sostén, apenas transcendeu unha actividade concreta ligada á estimulación mental. O grupo considera que o executivo local chega tarde á posta en marcha dun recurso social que, ao seu xuízo, debería estar xa consolidado como punto de encontro e dinamización comunitaria.

A polémica arrastra xa varios anos. En 2021, o goberno municipal explicitou que o proxecto non sería finalmente un centro de día, como se chegara a anunciar con anterioridade, senón un 'centro rural dinamizador de persoas maiores'. Esa redefinición xa motivara críticas da oposición, que vía no cambio unha rebaixa das prestacións previstas inicialmente para o inmoble.

Dous anos despois, en febreiro de 2023, o Concello informou do inicio das obras na parcela da antiga escola unitaria de Celas, reconvertida para uso asistencial. A actuación incluíu a construción dun edificio dunha planta, con 147 metros cadrados de superficie, porche, sala polivalente, sala de curas, aseos, almacéns e oficina, cun investimento de 199.417,22 euros. Daquela, o alcalde, José Ramón Rioboo, presentou a dotación como resposta a unha demanda veciñal e como un compromiso social coa parroquia.

Xa en maio de 2025 transcendeu que o centro ía abrir cun proxecto piloto de estimulación mental orientado á prevención da deterioración cognitiva, mediante obradoiros, exercicio físico e actividades de lecer. Porén, segundo denunciou Alternativa a finais de xaneiro de 2026, despois daquel anuncio non se concretou nin un calendario pechado nin unha programación estable para o funcionamento ordinario da instalación.

No fondo do debate está tamén o modelo de atención que necesita o rural de Culleredo. Alternativa sostén que un equipamento deste tipo debería ter unha función máis ampla que a dunha actividade puntual e converterse nun recurso útil fronte á soidade non desexada e á falta de servizos de proximidade para a poboación maior. A formación reclama agora ao goberno municipal que aclare que uso real terá o centro e cando prevé activalo plenamente.