Agarimo conmemora 50 anos acompañando e formando á mocidade en Arteixo
A Asociación Agarimo celebrará este venres, 26 de xuño, o seu 50 aniversario cun acto conmemorativo nas súas instalacións de Arteixo, situadas na rúa Padre Villa, 30. A cita dará comezo ás 11.15 horas e servirá para poñer en valor cinco décadas de acompañamento, formación e creación de oportunidades para mozos e mozas que precisan itinerarios educativos adaptados e unha atención próxima ás súas capacidades.
O alumnado será un dos grandes protagonistas da xornada cunha actuación de percusión, na que amosará parte das actividades que contribúen ao seu desenvolvemento persoal, educativo e creativo. O programa incluirá tamén a proxección dun vídeo conmemorativo, unha visita ás instalacións e un encontro entre familias, profesionais, entidades sociais, empresas colaboradoras e persoas vinculadas á historia de Agarimo.
A asociación naceu a partir do proxecto impulsado polo Padre Nemesio Fernández Villa e a Cidade dos Muchachos Agarimo. Medio século despois, mantén vivo o seu compromiso inicial: acompañar, formar e xerar oportunidades reais para a mocidade que precisa respostas educativas e laborais adaptadas.
Na actualidade, Agarimo desenvolve a súa actividade a través do CPR Agarimo, con aulas específicas de Educación Especial e ciclos formativos de Grao Básico en Cociña e Restauración, Carpintaría e Moble, e Agroxardinaría e Composicións Florais. Ademais, impulsa programas de formación para o emprego e orientación laboral.
Ao acto está prevista a asistencia da delegada territorial da Xunta na Coruña, Belén M.a do Campo Piñeiro; da subdirectora xeral de Formación para o Emprego, Antía Guillén García; da segunda tenente de alcalde do Concello de Arteixo, Inés Ramos Rey; da terceira tenente de alcalde, Josefa Zas Suárez; e do concelleiro de Promoción Económica e Festas, Ángel Vázquez Sande, ademais de representantes de entidades sociais, culturais e empresas colaboradoras.