Afaco abre un novo centro terapéutico na Coruña na zona de San Diego
Nestes primeiros días de xullo abriu as súas portas un novo centro terapéutico de Afaco (Asociación de Familiares de enfermos de Alzheimer e outras demencias afíns) situado no número 53 da rúa Vales Villamarín. O obxectivo deste servizo é mellorar a calidade de vida de persoas con demencia e as súas familias, para potenciar a súa autonomía e manter as capacidades cognitivas durante o maior tempo posible.
Deseñado desde a experiencia na aplicación de técnicas de estimulación para persoas afectadas por demencias (tipo Alzheimer ou outra), este centro funcionará de luns a venres, en horario de mañá e tarde. Poderanse contratar sesións desde hora e media e a partir de dous días á semana, e as persoas con axudas á dependencia concedidas poderían ter bonificación no programa.
A Asociación de Familiares de Enfermos de Alzheimer da Coruña é unha organización sen ánimo de lucro que conta na actualidade con tres centros de atención a persoas con demencias en diferentes fases. Trátase dos centros de día do Barrio das Flores, San Diego e Salvador de Madariaga, e o centro terapéutico novo de Vales Villamarín.
Entre os centros xestionados, en colaboración co concello e a Xunta de Galicia, e outros programas en colaboración con entidades ou concellos, aténdese na actualidade a uns 200 usuarios.