Actívase a alerta laranxa por temporal costeiro no litoral da Coruña
![Imaxe dun temporal costeiro na cidade da Coruña](https://acorunaxa.com/wp-content/uploads/2024/04/Imaxe-dun-temporal-costeiro-na-cidade-da-Coruna.jpg)
O mal tempo non da tregua entre este venres e o sábado en toda a costa do litoral da Coruña. Por iso, a Dirección Xeral de Emerxencias e Interior da Vicepresidencia Primeira da Xunta vén de activar para hoxe a alerta laranxa por temporal costeiro no litoral da provincia da Coruña.
A Axencia Estatal de Meteoroloxía (Aemet) informa de que o fenómeno meteorolóxico adverso estará activo desde primeiras horas desta tarde na costa oeste e noroeste coruñesa. Agárdase mar combinada do suroeste con ondas de ata 5 metros e vento do suroeste forza 8 entre Fisterra e Sisargas.
Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro Integrado de Atención ás Emerxencias 112 Galicia, informou da situación aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
Dende a Xunta aconsellan consultar a páxina web do CIAE 112 (www.112galicia.org), se é preciso xa que conta con información meteorolóxica e con ligazóns de interese.