Abre o prazo de preinscrición para as actividades dos centros cívicos do primeiro semestre de 2025
O Concello da Coruña abriu hoxe o prazo de preinscrición para a programación de actividades socioculturais nos centros cívicos durante o primeiro semestre de 2025. As persoas interesadas poderán realizar a preinscrición ata este xoves 12 de decembro, a través da páxina web municipal ou, no caso de non ter acceso a Internet, chamando ao número 881 150 637.
A concelleira de Benestar Social, Igualdade e Participación, Nereida Canosa, destacou que estas actividades, nas que participan anualmente máis de 10.000 persoas, son esenciais para fomentar a socialización e combater a soidade non desexada.
A programación abrangue un amplo abano de opcións, con actividades destinadas a menores de 12 anos, maiores de 60 e grupos interxeracionais. Ofértanse sesións de benestar (como pilates, yoga ou tai-chi), artísticas (canto, pintura), artesanais (costura, bordado), culturais, de cociña e de novas tecnoloxías, así como actividades específicas para maiores e apoio escolar e inglés para os máis pequenos.
As listaxes provisionais publicaranse o 19 de decembro e as reclamacións poderán presentarse o día 20 a través do teléfono 010. Os sorteos para asignar as prazas levaranse a cabo o 23 de decembro. Finalmente, as listaxes definitivas estarán dispoñibles o 10 de xaneiro e as inscricións formalizaranse os días 15, 16 e 17.
As actividades, que comezarán o 30 de xaneiro, están abertas ás persoas empadroadas no municipio, que terán prioridade fronte a solicitantes doutros concellos.