Aberta a convocatoria do III Premio Autobán ao Mellor Fanzine Galego
A Asociación Cultural Autobán, co apoio do Concello da Coruña, convoca a terceira edición do Premio Autobán ao Mellor Fanzine Galego 2025-2026, unha iniciativa que busca recoñecer e dar visibilidade á creación gráfica autoeditada en Galicia. O certame, pioneiro no ámbito da autoedición, abre o seu prazo de preinscrición en liña este luns 1 de xuño e manterao activo ata o día 12, ás 23.59 horas.
O premio principal estará dotado con 1.250 euros e cun trofeo personalizado realizado a man pola autora Julia Abalde, gañadora da pasada edición. Ademais, a convocatoria contempla un accésit cunha dotación económica de 350 euros.
Poderán presentarse autoras, autores e colectivos que teñan autoeditado un cómic ou fanzine gráfico en lingua galega ou desde Galicia entre o 15 de maio de 2025 e o 31 de maio de 2026. Cada participante poderá concorrer cun máximo de tres obras, sempre que a persoa autora ou a maioría dos integrantes do colectivo sexan de orixe galega ou residan en Galicia.
A organización deixa liberdade total canto ao tema, técnica, formato e deseño das propostas. As bases completas poden consultarse na web da Asociación Autobán, onde tamén se formalizará a preinscrición.
A obra gañadora será seleccionada por un xurado especializado e darase a coñecer a partir de mediados de xullo. A entrega do premio celebrarase no mes de agosto, dentro da edición de verán de 2026 do Festival Autobán, unha das citas de referencia da autoedición e da banda deseñada alternativa na Coruña.
Nas dúas primeiras edicións, o certame consolidouse como unha plataforma de impulso para creadoras e creadores vinculados ao fanzine e á ilustración. En 2024, Luis Yang gañou o primeiro premio coa obra ‘Sunny 16’, nunha convocatoria que recibiu 57 proxectos. Na edición de 2025, Julia Abalde foi recoñecida polo seu traballo ‘La ilusión’, mentres que Brais Rodríguez obtivo o accésit con ‘Enxoval’.
Autobán naceu como festival coruñés de cómic autoeditado e en 2023 constituíuse como asociación cultural. Desde entón mantén como obxectivo promover a banda deseñada, a ilustración, a autoedición e a autoxestión, ademais de crear espazos de encontro para autoras, autores, colectivos e microeditoriais.
O festival celebra cada mes de agosto a súa cita principal, coincidindo con Viñetas desde o Atlántico, e combina mercado de autoedición con presentacións, obradoiros, combates de debuxantes, exposicións, música e gastronomía. En 2026 regresará á Coruña coa súa décimo segunda edición.