Abegondo sufrirá cortes de tráfico este mércores pola gravación dunha serie de televisión
O Concello de Abegondo informou de que este mércores 29 de xullo produciranse diversas afeccións ao tráfico con motivo da gravación dunha serie de televisión en diferentes puntos do municipio.
As restricións afectarán á Ponte das Margaridas, no encoro Abegondo-Cecebre, á estrada entre Seixurra e Cecebre e á estrada AC-221. Ademais, tamén haberá limitacións no uso dos aparcadoiros situados xunto ao encoro durante o desenvolvemento da rodaxe.
Segundo informou o Concello, os cortes serán puntuais e intermitentes na maior parte dos tramos afectados para facilitar a gravación das distintas escenas. No caso da Ponte das Margaridas, si está previsto un corte total da circulación, aínda que se habilitarán desvíos alternativos para minimizar as molestias aos condutores.
O goberno local recomenda á veciñanza planificar con antelación os seus desprazamentos e seguir a sinalización provisional instalada na zona, así como as indicacións do persoal encargado da regulación do tráfico.
Nos mapas difundidos polo Concello recóllense os tramos afectados e os itinerarios alternativos previstos para facilitar a mobilidade durante a xornada.