A Xuntanza do Maior volverá reunir á veciñanza de Vilarmaior nunha nova xornada de convivencia
Vilarmaior volverá poñer o foco nas persoas maiores cunha nova edición da tradicional Xuntanza do Maior, unha cita promovida polo Concello que este ano chegará á súa novena convocatoria. O encontro desenvolverase o vindeiro 23 de maio e manterá o formato de convivencia que xa converteu esta celebración nunha das propostas sociais máis recoñecibles do municipio.
A xornada arrancará ás 13.00 horas cunha misa na igrexa parroquial de San Xurxo de Torres. A continuación, as persoas asistentes compartirán o xantar no Local Social e Polideportivo da mesma parroquia, nun programa que estará precedido por unha sesión vermú e que rematará con música en directo, co obxectivo de favorecer o reencontro e a convivencia entre a veciñanza de máis idade.
O Concello mantén así unha iniciativa de marcado carácter social, pensada para ofrecer un espazo de encontro ás persoas maiores do municipio e reforzar os lazos comunitarios arredor dunha celebración xa habitual en Vilarmaior. As persoas interesadas en participar deberán formalizar a inscrición ata o martes 19 de maio, de maneira presencial nos servizos sociais comunitarios, e a taxa fixada para asistir ao evento é de 15 euros por persoa.