A Xunta reforza con máis de 2 millóns o apoio ao CITIC da UDC
O secretario xeral de Universidades, José Alberto Díez, e a directora da Axencia Galega de Innovación, Carmen Cotelo, visitaron hoxe o Centro de Investigación en Tecnoloxías da Información e Comunicación (CITIC), da Universidade da Coruña (UDC), que conta co apoio da Xunta de Galicia cunha achega de máis de 2 millóns de euros. Este centro pertence á Rede CIGUS de excelencia científica de Galicia, integrada por 13 centros de investigación.
Os representantes da Consellería de Educación, Ciencia, Universidades e FP destacaron o traballo dos máis de 230 investigadores do CITIC en áreas clave como a intelixencia artificial, a ciencia de datos, a ciberseguridade e as redes intelixentes. Ademais, resaltaron o recoñecemento á investigadora Verónica Bolón, recentemente galardoada co Premio Nacional de Investigación 2024.
Durante a visita, puxéronse en valor os avances significativos deste centro en desenvolvemento tecnolóxico, colaboración con empresas de diferentes sectores e internacionalización. Ademais do apoio anual de 2 millóns de euros, a Xunta ten destinado ao CITIC un total de 6,4 millóns en diversas convocatorias.
Apoio ao CITEEC con máis de 800.000 euros
A xornada tamén incluíu unha visita ao Centro de Innovación Tecnolóxica en Edificación e Enxeñería Civil (CITEEC), recoñecido este ano como centro colaborativo na Rede CIGUS. Este centro, que conta con 90 investigadores, ten recibido un investimento de máis de 800.000 euros da Xunta, incluíndo axudas para adquisición de equipamento e proxectos de I+D.
O CITEEC destaca polas súas capacidades únicas en Galicia e no ámbito estatal, centradas en transición enerxética, transportes intelixentes, cambio climático e construción sustentable.