A Xunta lembra ao Concello de Sada que o municipio conta con 92 autobuses diarios coa Coruña
Esta mañá de vernes, a directora xeral de Mobilidade, Judit Fontela, mantivo unha reunión co alcalde de Sada, Benito Portela, para detallar a recente reestruturación dos servizos de autobús no corredor A Coruña-Mera-Sada, implementada desde o pasado 22 de xuño. Esta modificación permitiu incorporar novos servizos, eliminar duplicidades e reforzar as franxas horarias de maior demanda, resultando nun transporte público máis eficiente. En total, Sada conta con 92 servizos diarios que conectan o concello coa Coruña.
Fontela subliñou que o alcalde de Sada xa fora informado das modificacións antes da súa implantación. A reunión enmarcase no diálogo continuo que a Xunta mantén cos concellos para atender as súas demandas e realizar os axustes necesarios en función das necesidades da cidadanía.
As modificacións realizadas afectaron a franxas de menor demanda, como se evidenciou no seguimento continuo realizado pola Xunta desde a reestruturación. En Sada, os axustes foron puntuais, afectando só a 5 servizos de ida e 6 de volta, entre un total de 22 servizos diarios, e estiveron orientados a evitar duplicidades en determinados horarios.
Adicionalmente, implementouse unha liña lanzadeira no percorrido Sada-Carnoedo-Lorbé, que facilita á cidadanía de Carnoedo conectar coa nova oferta de servizos en Lorbé ou en Sada, con 11 servizos diarios.
Os cambios tamén permitiron sumar máis frecuencias no corredor A Coruña-Oleiros-Sada, incrementando en máis de 130 servizos semanais nas localidades de Dexo e Lorbé. O resto dos servizos entre Sada e A Coruña, a través dos corredores central e sur, mantén os 70 servizos directos sen cambios.
Desde o 1 de xullo, tamén se incluíron novas paradas nas parroquias de Carnoedo e Veigue, en Sada, en catro servizos que conectan Sada e A Coruña. Ademais, recuperáronse e ampliáronse servizos en determinadas franxas horarias, mellorando a conexión entre ambas localidades.