A Xunta destina máis de 2,2 millóns de euros á prevención de incendios forestais na provincia da Coruña
A Xunta de Galicia destinou este ano máis de 2,2 millóns de euros a diferentes actuacións de prevención de incendios forestais na provincia da Coruña. O investimento inclúe traballos de xestión da biomasa, mellora de pistas forestais, limpeza de cortalumes e outras intervencións destinadas a reducir o risco de propagación do lume e facilitar o acceso dos medios de extinción.
A conselleira do Medio Rural, María José Gómez, deu conta destes investimentos durante unha visita ás actuacións preventivas que se están desenvolvendo en Espasante, no municipio de Ortigueira, acompañada polo director xeral de Defensa do Monte, Manuel Francisco, o director-xerente de Seaga, Martín Martínez, e o alcalde de Ortigueira, Valentín Calvín.
Dentro do convenio de xestión da biomasa entre a Xunta e Seaga, realizáronse actuacións en vías de titularidade municipal ao longo de aproximadamente 180 quilómetros na provincia. Tamén se levaron a cabo traballos de mellora de pistas forestais e limpeza de cortalumes mediante maquinaria, cun investimento duns 455.000 euros.
A esta cantidade súmanse outros 1,8 millóns de euros destinados directamente pola Consellería do Medio Rural a actuacións preventivas na provincia. Entre elas figuran a creación de áreas cortalume, faixas auxiliares de pistas e diferentes tratamentos silvícolas.
Preto de 200.000 euros en actuacións en Ortigueira
No caso concreto de Ortigueira, os traballos céntranse actualmente na reparación e mellora de infraestruturas forestais mediante maquinaria pesada, incluíndo motoniveladoras, pas mixtas e bulldozers.
Ata o momento, as intervencións permitiron actuar sobre uns 26 quilómetros de pistas, aínda que está previsto continuar coas melloras nas próximas datas.
O investimento preventivo no municipio achégase aos 200.000 euros, contabilizando os tratamentos preventivos, as actuacións financiadas directamente pola Consellería, os fondos procedentes do convenio con Seaga e a apertura de novas pistas forestais.
Precisamente, a creación destas novas vías foi destacada pola conselleira, que subliñou a importancia de manter as pistas abertas tanto para a veciñanza como para facilitar o acceso dos servizos de Defensa do Monte no caso de que sexa necesario actuar ante un incendio.
Gómez tamén puxo en valor a participación do Concello de Ortigueira no convenio con Seaga e destacou a importancia de que os municipios non só se adhiran ao programa, senón que tamén propoñan as zonas nas que consideran prioritario desenvolver os traballos.
A prevención chegará a 34.000 hectáreas en Galicia
As actuacións realizadas na provincia da Coruña forman parte dun programa de prevención que se estende polo conxunto de Galicia. Segundo os datos facilitados pola Xunta, este ano o Goberno galego conta con máis de 213 millóns de euros para prevención e defensa contra os incendios forestais, un 18 % máis que no exercicio anterior.
No ámbito da prevención, a Xunta reforzou tamén a colaboración con concellos e propietarios para facilitar a xestión da biomasa nas proximidades das vivendas.
O convenio con Seaga, asinado en decembro de 2025, está dotado con 25 millóns de euros e conta actualmente con 299 municipios adheridos.
A previsión da Xunta é que, cando remate o ano, os traballos preventivos realizados en Galicia abrangan preto de 34.000 hectáreas, o que suporía un incremento do 70 % respecto ao ano 2025.
Desde o Goberno galego defenden que estes traballos deben manterse durante todo o ano para reducir a cantidade de combustible existente nos montes, facilitar o acceso dos equipos de extinción e diminuír o risco asociado aos incendios forestais.