A Xunta comezou traballos de conservación no río Mero en Abegondo e Oza-Cesuras
Co obxectivo de mellorar as condicións naturais do río Mero e garantir unha circulación fluída das súas augas, a Consellería de Medio Ambiente e Cambio Climático, a través de Augas de Galicia, deu inicio a unha serie de traballos de conservación e mantemento. Estas actuacións desenvolveranse ao longo de 580 metros da canle fluvial, que abarca as parroquias de Santiago de Meangos en Abegondo e Santa María de Cuíña en Oza-Cesuras.
As tarefas centranse na retirada de árbores e biomasa presentes no leito do río para evitar o bloqueo da corrente, así como na roza selectiva de arbustos que dificultan o acceso á canle. Os traballos, comunicados previamente aos concellos afectados, prolongaranse durante aproximadamente dúas semanas e implicarán o uso de ferramentas manuais, motoserras, rozadoiras e maquinaria pesada como tractores e camións.
Estas accións forman parte do programa autonómico de mantemento e mellora do dominio público hidráulico das bacías de Galicia-Costa. O obxectivo é optimizar as condicións dos leitos fluviais, mellorando o ecosistema dos ríos e garantindo que as augas circulen con normalidade, ao tempo que se preserva a integridade ambiental nas zonas de competencia da Xunta, fóra das áreas urbanas.