A Xunta adxudica por case 48 millóns de euros a construción de 250 vivendas públicas en Xuxán
A Xunta de Galicia deu un novo paso no desenvolvemento de vivenda pública na Coruña coa adxudicación do contrato para construír 250 vivendas de promoción pública en Xuxán, unha actuación que suporá un investimento de 47.960.692,25 euros.
A decisión foi autorizada este venres polo consello de administración da Sociedade de Vivenda Pública de Galicia (Vipugal), presidido pola conselleira de Vivenda e Planificación de Infraestruturas, María Martínez Allegue.
O contrato inclúe a redacción do proxecto, a dirección de obra e a execución dos traballos de construción. A empresa Constructora San José, S.A. será a encargada de desenvolver a promoción, que deberá executarse obrigatoriamente mediante técnicas industrializadas, un sistema co que se busca reducir os tempos de execución e mellorar a eficiencia construtiva.
As vivendas levantaranse na parcela Z-44 de Xuxán, de titularidade autonómica. O solo estaba inicialmente reservado para oficinas, pero a Xunta promoveu unha modificación do Plan Xeral de Ordenación Municipal (PXOM) da Coruña para destinalo a uso residencial, ao considerar que non existía demanda de espazos de oficinas nesa zona.
O contrato fora licitado por 51.581.729,67 euros, aínda que finalmente foi adxudicado por un importe inferior, de 47.960.692,25 euros.
Segundo destacou a Consellería de Vivenda e Planificación de Infraestruturas, esta promoción forma parte da aposta do Goberno galego por incrementar o parque público residencial. Na actualidade, a Xunta ten en distintas fases de desenvolvemento 1.061 vivendas de promoción pública no municipio da Coruña.