A Xunta abre ata o 30 de setembro a licitación dos proxectos de Monte Mero e A Baiuca
A Xunta abriu este mércores o prazo para presentar ofertas á redacción dos proxectos de urbanización dos ámbitos residenciais de Monte Mero, na Coruña, e A Baiuca-A Penouqueira, en Arteixo, dentro da Estratexia Galega de Solo Residencial. O proceso permanecerá aberto ata o vindeiro 30 de setembro.
Trátase dun novo paso administrativo para desenvolver estes dous Proxectos de Interese Autonómico (PIA), que prevén a construción de 4.397 vivendas na Coruña e outras 160 en Arteixo, das que a maioría serán protexidas.
Segundo avanzou a Consellería de Vivenda e Planificación de Infraestruturas, a previsión é licitar as obras de urbanización ao longo de 2027, unha vez estean redactados e aprobados os proxectos e adquirido o solo. O obxectivo é que durante 2028 poidan desenvolverse de forma paralela os traballos de urbanización e a construción das primeiras vivendas.
Os ámbitos de Monte Mero e A Baiuca forman parte dun paquete de sete PIA que permitirán impulsar preto de 15.000 vivendas en Galicia, cun investimento de 6,4 millóns de euros na redacción dos proxectos de urbanización.