A voz dos alcaldes: 'O máis importante é o pobo, dedicado ao 100%'
Como se iniciou na política e como se vinculou ao seu partido?
Eu empecei na política no ano 1982 en Alianza Popular. Estou afiliado dende 1985 e dende entón levo traballando co partido ata hoxe. Fíxenme camiño no ámbito municipal, pasei por responsabilidades de goberno e fun tamén tenente de alcalde antes de chegar á Alcaldía.
Como deu o salto e recibiu o impulso para ser alcalde?
No meu caso foi unha circunstancia moi concreta: faleceu o anterior alcalde e eu tomei posesión no ano 2005. Nunca o pensara como un obxectivo persoal, porque había outra persoa por diante, pero non aceptou e tocoume a min dar o paso.
A nivel persoal, que sacrificios supón formar parte do Goberno?
O maior sacrificio é o tempo e a dispoñibilidade. Eu dedico moitísimas horas e o teléfono está sempre aceso, non o apago nunca. Chamáronme incluso ás 3 ou 5 da mañá por unha emerxencia e eu atendo. Como alcalde, estás dispoñible todo o día, a todas horas, e iso ás veces pega uns sobresaltos importantes.
E beneficios?
O bo é que estás aí para a xente. Para min o máis importante é o pobo. Eu síntome dedicado ao 100%, e cando podes axudar e responder, compensa.
Como equilibra a vida pública e a privada?
Ímolo levando como podemos, nin máis nin menos. É un equilibrio complicado, porque sempre hai chamadas e problemas, pero vas tirando.
Cales son os seus obxectivos a nivel político?
O meu obxectivo estrela é chegar co abastecemento ao 100% da poboación, agora estamos arredor do 91-92% e quero completar o que falta. Despois, seguir reforzando o saneamento e continuar coas melloras nos viais, que están practicamente todos aglomerados.
E se renova na Alcaldía cales son as principais actuacións previstas?
Proxectos en mente teño moitísimos, pero non podo desvelar nada aínda. Non sabemos nin o que vai pasar mañá. O que si digo é que a idea é seguir a mesma liña, traballando como ata agora.
Cales son as principais liñas do seu programa?
Ademais de abastecemento, saneamento e viarios, para min é clave que chegue a fibra óptica para o internet a todas as vivendas. Aínda faltan zonas sen conexión e estamos pelexando con empresas para avanzar, porque cara ao futuro é moi necesario.
Cales considera que son as principais necesidades no seu concello?
Agora mesmo preocúpame moito o servizo de axuda a domicilio, xa que temos arredor de 120 persoas maiores de 80 anos, e unha parte moi importante está con axuda a domicilio entre dependencia e o propio servizo. Chegar a todos e manter esa atención é unha prioridade real.
De que proxectos se sente máis orgulloso?
Eu estou especialmente orgulloso do abastecemento. Foi un esforzo económico enorme, con subvencións da Xunta e da Deputación, e supuxo máis dun millón de euros e uns 92 km de tubaxes para dar servizo á maior parte do concello. Tamén destacaría o alcantarillado e unha depuradora que funciona con placas solares.
Que lle gustaría que os veciños visen en vostede como alcalde?
Gustaríame que me visen como unha persoa dialogante, que non defrauda a ninguén. Eu intento ser así e seguirei intentando non defraudar.
Como é a súa relación coa oposición?
Eu creo que vai ben. Hai comunicación e pido sempre respecto á oposición e que a oposición respecte ao goberno. Se propoñen algo viable, témolo en conta.
EN CLAVE PERSOAL
- Idade, estado civil e familiar
Teño 66 anos, estou casado e teño unha filla. - Profesión e formación
Estudei bacharelato, fixen un curso de electricidade (no Exército) e tamén levei unha explotación gandeira. - Se puidera escoller, que lle gustaría ser?
A verdade é que eu nunca pensei en ser alcalde. Eu estaba entusiasmado co meu traballo e co campo. - Que quería ser de maior?
De pequeno gustábame un pouco de todo, como a moitos rapaces, pasábache pola cabeza ata ser policía. - Que fai para desconectar?
É case imposible desconectar, pero cando podo vexo o fútbol, son do Real Madrid, ou algún debate. - Unha virtude e un defecto
A miña virtude penso que é que son moi dialogante. Como defecto diría que ás veces escoito de máis. - Un consello para compartir
Que sexamos humildes. - Un libro
Leo un moi voluminoso a ratos e nunca o acabo: Don Quixote.
Unha Película
Gladiator, aínda que me gustan tamén as do oeste.
Un grupo de música/cantante
Os Scorpions. - Unha afección
Supoño que ir ver o fútbol o bar cando podo. - Un lugar que visitar
As Fervenzas de Zarzo, aquí en Irixoa. - Unha comida e unha bebida
Un bo cocido e un bo viño Mencía. - Unha personaxe admirada
Amancio Ortega. - Unha posesión apreciada
O máis importante para min foi ter a miña filla. - Un desexo
Saúde. - Algo para esquecer
A época da pandemia do covid, que foi moi dura. - Que é o que máis valora nunha persoa?
A humildade. - Un desafío pendente
Rematar de completar o abastecemento e seguir co saneamento onde faga falta. - Onde se ve en cinco anos?
Non o sei a verdade, é complicado. Igual viaxando.