A vivenda comunitaria de Vilasantar mellorará accesibilidade e confort con preto de 36.000 euros
A vivenda comunitaria municipal de Vilasantar contará este verán cun novo paquete de actuacións destinadas a mellorar o confort, a accesibilidade e a conservación das súas instalacións. A Xunta destinará preto de 36.000 euros a estas obras a través do Consorcio Galego de Servizos de Igualdade e Benestar, segundo confirmou o seu xerente, Perfecto Rodríguez, durante unha visita ao centro xunto ao alcalde, Fernando Pérez Fernández.
Os traballos previstos inclúen o pintado de todas as fachadas exteriores, a instalación de varandas na rampla de acceso ao patio posterior para facilitar a mobilidade das persoas usuarias, a renovación de distintos elementos do sistema de calefacción e a execución de pequenos arranxos no interior do edificio. O obxectivo é incrementar o benestar das persoas maiores residentes e garantir unhas instalacións máis cómodas, seguras e eficientes.
Esta actuación dá continuidade ás melloras realizadas nos últimos anos na vivenda comunitaria. En 2023, o Consorcio xa financiara outra intervención para renovar as habitacións do centro, coa substitución do mobiliario, a instalación de novos elementos nos baños e a modernización do sistema de climatización, ademais doutras actuacións de mantemento. O inmoble dispón de capacidade para unha ducia de persoas usuarias e constitúe un recurso asistencial de referencia para o municipio.
As obras de Vilasantar forman parte dun plan de mellora impulsado polo Consorcio Galego de Servizos de Igualdade e Benestar nos centros de maiores que xestiona en Galicia. O programa conta cun investimento global de 1,7 millóns de euros, financiado con fondos europeos do Mecanismo de Recuperación e Resiliencia, e permitirá executar actuacións orientadas a modernizar os edificios, mellorar a eficiencia das instalacións e reforzar a calidade da atención ás persoas maiores.