A viticultura sostible centra unha xornada técnica en Abegondo
A Reserva de Biosfera Mariñas Coruñesas e Terras do Mandeo acollerá o xoves 14 de maio unha xornada dedicada á infraestrutura verde e á súa aplicación na viticultura do territorio da IXP Betanzos. O encontro, enmarcado no proxecto europeo ECOSPHEREWINES, desenvolverase en Abegondo entre as 10.00 e as 13.30 horas.
A sesión abrirase ás 9.50 horas coa recepción das persoas asistentes e continuará ás 10.00 horas coa benvida institucional, na que participarán José Antonio Santiso Miramontes, presidente da Reserva de Biosfera Mariñas Coruñesas e Terras do Mandeo, e José Manuel Andrade Calvo, director da Fundación Juana de Vega.
O programa inclúe dúas intervencións técnicas. A primeira, prevista para as 10.15 horas, correrá a cargo do doutor Alfonso Ribas, director da área de Investigación e Innovación da Fundación Juana de Vega, que abordará o proxecto ECOSPHEREWINES e a mellora dos servizos ecosistémicos en zonas vitícolas de alto valor ecolóxico. Ás 10.30 horas será a quenda do doutor Juan José Villaverde, científico titular do CSIC na Misión Biolóxica de Galicia, que falará sobre o avance cara á ecoeficiencia nas explotacións vitivinícolas a través de SoilWineResidues.
Tras unha pausa café, ás 11.15 horas está prevista unha visita técnica a unha parcela piloto para coñecer sobre o terreo as actuacións de implantación de infraestrutura verde. A actividade estará dirixida polo equipo técnico do proxecto, con participación de Nuria Freire e a doutora Anabel González Alba, da Fundación Juana de Vega; a doutora Vanessa Álvarez e o doutor Marcos Lado, investigadores da Universidade da Coruña; e Nicolás Ron Arroyo, técnico da Reserva de Biosfera Mariñas Coruñesas.
A xornada rematará ás 13.15 horas co regreso á sede, o peche do encontro e unha degustación de viño da IXP Betanzos. A organización lembra que o desprazamento á parcela correrá a cargo do proxecto e recomenda levar calzado e roupa cómoda, xa que o terreo é irregular e con pendente.