‘A vila do mañá’ levará xogos e aprendizaxe ás rúas de Sada
‘A Vila do mañá’ converterase durante a primeira semana de setembro nun espazo lúdico e educativo nas rúas de Sada. A iniciativa busca achegar á infancia e á mocidade ao coñecemento do patrimonio, da arquitectura, do urbanismo e da paisaxe, fomentando valores como a creatividade, o respecto polo entorno e a colaboración a través do xogo.
As actividades desenvolveranse na rúa Bergondo e na praciña de Correos, en horario de mañá, de 10.00 a 14.00 horas. Están dirixidas a todas as persoas nadas ata 2019, é dicir, maiores de 5 anos, e non teñen límite de prazas. A participación é completamente gratuíta, mais é necesario inscribirse previamente a través da web municipal por cuestións organizativas.
O proxecto tamén pretende favorecer a conciliación familiar antes do inicio do curso escolar, ofrecendo ás familias un espazo seguro e educativo para que a infancia aprenda xogando. ‘A Vila do mañá’ combina tradición e educación nunha proposta que reforza o vínculo da veciñanza co patrimonio local e a vida comunitaria.