A Valedora do Pobo dálle a razón a Miño e insta á Xunta a limitar as persoas que viaxan de pé no bus escolar a Betanzos
A Valedora do Pobo emitiu unha resolución na que avala as reclamacións do Concello de Miño e das familias afectadas pola masificación do transporte cara a Betanzos. No seu escrito, diríxese á Consellería de Presidencia, Xustiza e Deportes para suxerir que se avalíe unha actualización das condicións do transporte interurbano co obxectivo de limitar o número de persoas que poden ir de pé, especialmente nos servizos integrados empregados polo alumnado de Secundaria.
A resposta chega despois da queixa formal presentada polo alcalde, Manuel Vázquez Faraldo, acompañada de 336 sinaturas. O Concello denunciaba a situación na liña XG87106501 (Centro de Saúde de Betanzos, Ponte do Porco, Miño 2), na que estudantes se ven obrigados a viaxar de pé ou mesmo sentados nas escaleiras nun autobús saturado durante o traxecto pola N-651.
A Xunta xustificara que o vehículo cumpre a normativa ao contar con prazas de pé homologadas para percorridos curtos, pero a Valedora é clara ao lembrar que os estándares de calidade e seguridade dun servizo público esencial evolucionaron e que debe primar a protección dos menores.
O alcalde de Miño valorou o pronunciamento como un respaldo á postura municipal e insistiu en que o debate non pode quedar reducido ao cumprimento formal da norma cando (segundo sostén o Concello) hai risco para rapazada nunha estrada nacional.
Desde o goberno local reiteran que a saída pasa por recuperar alternativas que alivien a carga do servizo: ampliar de novo a ruta XG87101201 (Vilamateo, Miño) ata Betanzos para o uso xeral, e deixar a XG87106501 como transporte exclusivamente escolar, de xeito que non se mesture alumnado con usuarios ordinarios nun vehículo que consideran insuficiente.