A vaga de calor activa a alerta amarela no interior da provincia da Coruña
A Dirección Xeral de Saúde Pública da Consellería de Sanidade activou unha alerta meteorolóxica de nivel amarelo por vaga de calor no interior da provincia da Coruña, un episodio que comezou este xoves 9 de xullo e que afecta a varios concellos das comarcas do interior, entre eles Vilasantar, Aranga, Curtis, Irixoa, Oza Cesuras, Coirós, Paderne, Abegondo e Ordes.
A alerta responde ás previsións de temperaturas elevadas durante os vindeiros días, polo que as autoridades sanitarias recomendan adoptar medidas de prevención para reducir os riscos asociados á calor, especialmente entre as persoas maiores, os nenos, os doentes crónicos e outros colectivos vulnerables. A alerta forma parte do Plan galego de actuación fronte aos efectos das altas temperaturas sobre a saúde.
Entre as recomendacións figuran manter unha boa hidratación, beber auga con frecuencia aínda que non se teña sede, evitar a exposición ao sol durante as horas centrais do día, permanecer en lugares frescos e ventilados e reducir a actividade física intensa no exterior. Tamén se aconsella utilizar roupa lixeira, protexerse cunha gorra ou sombreiro e prestar especial atención ás persoas que viven soas ou presentan maior risco ante episodios de calor extrema.
Ante calquera emerxencia, debe chamarse ao teléfono 112. Ademais, fan un chamamento á prudencia mentres se manteña activo este episodio de altas temperaturas. A vaga de calor forma parte dun episodio que afecta a boa parte da Península e que está a deixar rexistros moi elevados en numerosos puntos de España. Aínda que se prevé un descenso progresivo das temperaturas nos próximos días en parte do territorio, as autoridades insisten en seguir as recomendacións de protección mentres dure a alerta.