A UDC organiza polo Día Internacional da Muller no Sector Marítimo a xornada 'Pioneiras do Mar'
A Escola Técnica Superior de Náutica e Máquinas da Universidade da Coruña acollerá este xoves, 16 de maio, a xornada 'Pioneiras do mar', no que participarán mulleres profesionais que traballan no sector, onde darán a coñecer as súas motivacións e experiencias, co obxectivo de servir de inspiración para as próximas xeracións.
A xornada terá lugar entre as 10.00 e as 14.30 horas, e contará con dúas mesas de mulleres que desenvolven a súa actividade profesional na Mariña Mercante, en Vixilancia Aduaneira, e en AENOR. Así mesmo, o evento contará cunha charla informativa sobre vixilancia aduaneira.
O evento desenvólvese con motivo da celebración o 18 de maio do Día Internacional da Muller no Sector Marítimo, cuxa finalidade é homenaxear ás mulleres que traballan neste eido. A efeméride está promovida pola Organización Marítima Internacional (OMI) e este ano 2024 conta co lema "Perspectivas seguras: as mulleres forxan o futuro da seguridade marítima", recoñecendo o papel fundamental que desempeñan as mulleres para mellorar as medidas de seguridade, xa sexa en calidade de mariñeiras, de profesionais deste sector, ou en postos directivos.
Segundo verbas do secretario Xeral da OMI, Kitack Lim, “segue habendo un importante desequilibrio entre homes e mulleres no sector marítimo. Os tempos están a cambiar, pero temos que acelerar ese cambio”.