A UDC coroase como 'mellor rookie' no maior certame de analítica de datos
A Universidade da Coruña logrou o galardón ao ‘mellor rookie’ na clasificación 2024 da Cajamar ‘University Hall of Fame’. Esta competición supón o maior certame de analítica de datos de España.
O premio recoñece á universidade mellor clasificada entre os centros universitarios españois incorporados nas tres últimas edicións a este certame, no que participaron, ao longo das súas sete edicións, 35 universidades e centros de formación de toda España.
O reitor da Universidade da Coruña (UDC), Ricardo Cao, recibiu esta mañá de mans do director de Cajamar na Coruña, Jose Mateo Moinelo Allegue, o recoñecemento logrado polos seus estudantes de intelixencia artificial e ciencia de datos, que mostraron un elevado nivel. O reitor agradeceu o galardón e sinalou a importante aposta formativa e de investigación que fai a UDC en titulacións relacionadas coa análise de datos: os graos de Ciencia e Enxeñería de Datos, Intelixencia Artificial e Enxeñería Informática, así como os másteres universitarios en Intelixencia Artificial, Técnicas Estatísticas, Ciencia e Tecnoloxía da Información Cuántica, Computación de Altas Prestacións, Ciberseguridade, Enxeñería Informática, Matemática Industrial e Bioinformática para as Ciencias da Saúde.
Pola súa parte, Jose Mateo Moinelo explicou que a finalidade da Cajamar UniversityHack, “é ser un nexo entre os problemas e desafíos reais das empresas españolas e a aplicación do coñecemento da comunidade universitaria especializada en intelixencia artificial e ciencia de datos (data science) a través das súas propostas e solucións”. Así mesmo, mostrou a súa satisfacción pola “boa acollida que cada ano recibe a proba, e a calidade e creatividade que mostran as solucións presentadas polos estudantes”.
Na clasificación dos mellores centros, denominado ‘UniversityHack Hall of Fame’, en función das participacións e clasificacións conseguidas no últimos cinco anos, Afi Escuela obtivo o primeiro posto, seguida pola Universidade de Sevilla, e a Universitat Politècnica de València, en terceira posición.