A UDC comeza o curso escolar con 440 estudantes internacionais de 45 países
Un total de 440 estudantes procedentes de 45 países distintos cursarán o primeiro cuadrimestre ou o curso completo 2024-2025 na Universidade da Coruña (UDC). Esta semana, a Facultade de Informática acolleu o acto de benvida para o alumnado internacional, unha xornada organizada coa finalidade de facilitar a súa adaptación á vida universitaria e á cidade.
O evento ofreceu información detallada sobre os principais servizos da universidade, como a biblioteca, instalacións deportivas e servizos de apoio ao estudante, así como os pasos administrativos necesarios para regularizar a súa matrícula e estadía. Tamén se presentou o calendario académico e explicouse o funcionamento dos contratos de estudos vinculados aos programas de mobilidade internacional.
Ademais de orientación académica, os estudantes recibiron agasallos de benvida e participaron en charlas ofrecidas por representantes dos clubs locais de rugby e hóckey, quen animaron aos asistentes a unirse ás súas actividades deportivas durante o curso.
A xornada contou coa participación de Bruno Casal Rodríguez, adxunto de Mobilidade e Convenios da UDC, quen destacou a importancia da diversidade cultural e a internacionalización dentro da institución.