A UDC celebra o venres 26 de abril as Olimpíadas de Salvamento Marítimo
A Escola Técnica Superior de Náutica e Máquinas da Universidade da Coruña organiza unha nova edición das Olimpíadas de Salvamento Marítimo, que terán lugar o vindeiro venres, 26 de abril, en horario de 9.00 a 14.00 horas, na Aula Náutica da UDC.
A competición consistirá na realización de diversas probas relacionadas coas prácticas de seguridade marítima e están abertas a calquera persoa estudante de estudos universitarios, formación profesional, bacharelato e educación secundaria obrigatoria, que poderán competir de xeito individual ou por equipos e por categoría segundo a idade.
Entre as probas que deberán realizar atópanse as seguintes: poñer o traxe de supervivencia nun tempo máximo de 2 minutos, unha proba a nado de relevos con traxe de supervivencia, volteo e arrastre de balsa salvavidas, lanzamento de sisga e manexo de embarcación de rescate
Os participantes mellores clasificados de cada categoría recibirán un premio por parte da Escola Técnica Superior de Náutica e Máquinas. O prazo de inscrición para poder participar nas probas remata o vindeiro día 5 de abril, e poderá realizarse a través da seguinte ligazón.
