A UDC aproba as modificacións de titulacións e novos másteres para o curso 25/26
O Consello de Goberno da Universidade da Coruña aprobou este mércores nunha convocatoria extraordinaria a proposta de inclusión de tres novas titulacións de máster para o curso 25/26. Trátase dos títulos de Máster Universitario en Criminoloxía; Máster Universitario en Realidade Estendida e o Máster Universitario en Ciencias do Exercicio, Preparación Física e Readaptación Deportiva; todos eles de carácter interuniversitario entre Universidade da Coruña e a de Vigo, nos dous primeiros casos, coordinados pola UDC e no último pola UVigo.
Así mesmo, foi aprobada a modificación de titulacións de tres graos (Comunicación Audiovisual, Turismo e Logopedia), para a súa implantación no curso 25/26, cambios que veñen determinados fundamentalmente para a súa adaptación ao RD 822/2021, polo que se establece a organización do ensino universitario e do procedemento de aseguramento da súa calidade. Por esta mesma razón leváronse as modificacións para seis titulacións de másteres (Enxeñaría Mariña, Náutica e Transporte Marítimo, Ciencia e Tecnoloxías da Información Cuántica, Enxeñaría Naval e Oceánica, Psicoloxía Aplicada e Asistencia e Investigación Sanitaria), que foron aprobadas neste Consello.
Como terceiro punto da orde do día, foi aprobado por unanimidade o manifesto “UDC por Palestina”, un documento no que se levaba traballando nas últimas semanas a través dunha comisión composta por representantes do equipo de Goberno, da rede UDCxPalestina e do estudantado acampado.
Tras a aprobación en decembro de 2023 dun comunicado oficial por parte do Consello de Goberno, que demandaba o alto ao fogo inmediato, así como que Israel cumprira as resolucións da ONU, a retirada dos territorios ocupados e o apoio activo á Corte Penal Internacional para investigar os crimes de guerra e de lesa humanidade cometidos en Palestina, ante o agravamento da violencia e a persistencia xenocida de Israel, o Consello de Goberno da UDC aprobou hoxe este manifesto que consta dos seguintes 6 puntos:
1. A UDC recoñece publicamente que a violencia extrema que exerce Israel contra o pobo palestino é un xenocidio. Esixe o cesamento da violencia de modo inmediato e permanente e que se facilite a axuda humanitaria. Reclama o respecto aos dereitos humanos e de autodeterminación do pobo palestino. E rexeita a destrución das institucións de coñecemento de Palestina.
2. A UDC creará unha comisión que analice e faga públicas as colaboracións que manteña con empresas, universidades, institutos, centros de investigación e institucións públicas israelís. Informará aos grupos de investigación da UDC sobre as medidas que cómpre tomar, así como da negativa de apoio institucional da UDC a todo proxecto ou contrato con elas. Non participará en ningún acto académico nin institucional en que estean presentes. E promoverá a elaboración dun código de boas prácticas en investigación, amais da revisión do Código Ético da Investigación da UDC para impedir a promoción ou apoio ás situacións de xenocidio e apartheid, e nomeadamente para rexeitar a colaboración con institucións que exerzan violencia sobre o pobo palestino.
3. A UDC instará ás autoridades pertinentes a revisaren as relacións diplomáticas con Israel e a suspenderen o Acordo de Asociación UE-Israel. A UDC promoverá nas universidades do SUG unha iniciativa para solicitarlle á CRUE, á Xunta de Galicia, ao Goberno estatal e á Comisión Europea o bloqueo da participación de institucións israelís en proxectos financiados por fondos europeos, comprometéndose a non asinar novos acordos con entidades públicas ou privadas que colaboren ou favorezan, directa o indirectamente, o xenocidio do pobo palestino.
4. Tomando como exemplo a iniciativa Rebuilding Hope da Universidade de Birzeit, a UDC comprométese a promover a comunicación coas universidades palestinas para coñecer as súas necesidades e as da súa comunidade. Comprométese a apoiar accións que favorezan a captación de recursos para recuperar as infraestruturas universitarias palestinas. Comprométese a impulsar a colaboración interbibliotecaria coas universidades palestinas para paliar os danos irreversibles provocados pola destrución das bibliotecas. Comprométese a favorecer a aprendizaxe telemática do estudantado de Palestina, co-supervisar os traballos académicos e ofrecer apoio psicolóxico e social na medida das súas posibilidades. E comprométese a formalizar convenios bilaterais que permitan a colaboración académica e investigadora entre as universidades palestinas e a UDC.
5. A UDC promoverá accións de visibilización dos elementos culturais palestinos e da historia contemporánea de Palestina (bandeiras de Palestina, exposicións temáticas, charlas, obradoiros, proxeccións de documentais…).
6. A UDC impulsará a creación dunha Cátedra por Palestina, que promoverá o estudo e a conservación da cultura dunha comunidade ameazada; promoverá investigacións transformadoras que permitan resolver dilemas suscitados pola violencia; procurará favorecer a reconstrución social, cultural e ecolóxica de Palestina; e poderá ampliar os seus eidos de estudo ás resistencias anticoloniais, incluíndo a perspectiva educativo/formativa en dereitos humanos e xustiza en relación cos pobos esquecidos.
Deste xeito, a UDC asume este manifesto poñendo en valor a defensa dos dereitos humanos e o rexeitamento ás agresións altamente violentas e de lesa humanidade. A comisión redactora do mesmo será a encargada de facer o seguimento das medidas.