A transformación da Travesía de Arteixo estrea un aparcadoiro con 26 prazas
Arteixo abriu ao público un novo aparcadoiro no inicio da Travesía, na zona máis próxima ao cruzamento de Sabón. A actuación permitiu habilitar 26 prazas nun ámbito con alta demanda de estacionamento debido á presenza de locais de hostalaría, comercios e das dúas notarías coas que conta o municipio.
A creación deste espazo forma parte das obras de urbanización e humanización da Travesía de Arteixo, unha intervención que avanza coa maior parte das demolicións xa finalizadas. Entre elas figuran as cinco vivendas situadas na contorna do cruzamento coa estrada cara a Morás, un dos puntos máis conflitivos para o tráfico pola súa estreiteza e polas dificultades de xiro para vehículos de grandes dimensións.
A primeira fase da reforma abrangue desde a rotonda de Sabón ata o cruzamento das rúas Reconquista e Independencia. Trátase dun treito de arredor de 1,8 quilómetros nunha vía na que viven preto de 2.600 veciños e veciñas e na que o Concello busca mellorar a convivencia entre peóns e vehículos.
O proxecto, cun orzamento próximo aos 3,6 millóns de euros, inclúe a creación de novos aparcadoiros, zonas de descanso, beirarrúas accesibles e continuas, renovación de firmes e pavimentos, reordenación de colectores e actualización da sinalización horizontal e vertical.
A actuación tamén prevé a mellora da iluminación pública con tecnoloxía LED e a regulación do tráfico mediante novas rotondas. O obxectivo é reforzar a seguridade viaria, modernizar a contorna urbana e dar continuidade á transformación dunha das principais vías do municipio.
O alcalde, Carlos Calvelo, sinalou que a intervención pretende mellorar unha das zonas máis habitadas do casco urbano e continuar impulsando solucións integrais de urbanización que contribúan a elevar a calidade de vida da veciñanza.