A Torre de Hércules despide o verán con recreacións romanas, teatro e actividades históricas
A contorna da Torre de Hércules converterase esta fin de semana nun escenario para viaxar polo pasado con motivo da programación especial organizada polo Concello da Coruña para despedir o verán. Os días 5 e 6 de setembro haberá recreacións históricas, teatro, obradoiros e propostas divulgativas pensadas para públicos de todas as idades.
A xornada do sábado 5 de setembro estará especialmente dedicada á época romana coa celebración de Ave Crunia, unha recreación histórica na que participarán as asociacións Royal Green Jackets e Gallaecia Viva. As actividades desenvolveranse de 11.30 a 14.00 horas e de 18.00 a 21.00 horas.
Royal Green Jackets despregará un campamento militar romano con arredor dunha ducia de recreadores e recreadoras. O público poderá coñecer de preto a vida dos lexionarios a través de actividades como a 'Escola de pequenos lexionarios', as rondas militares, un fotocol ou a dramatización da escolta dun senador e do apresamento dun prisioneiro castrexo.
Gallaecia Viva achegará a vertente civil da sociedade romana cunha pérgola ambientada como unha tabernae, ademais de pequenas teatralizacións, xogos romanos e actividades sobre a vida cotiá da época. A programación incluirá tamén loitas de gladiadores, cerimonias relixiosas e desfiles civís.
Ao longo da xornada haberá igualmente demostracións sobre a escola grecolatina, a fragua histórica, a cociña romana e o tear vertical. As propostas completaranse con exhibicións de armamento romano, microteatro e actividades divulgativas sobre a gladiatura e a pompa gladiatoria.
Teatro ao pé da Torre
O teatro terá tamén un papel destacado durante o sábado. Ás 17.00 horas, Noite Bohemia ofrecerá unha ruta teatralizada pola rampla da Torre de Hércules na que os participantes poderán percorrer a evolución histórica do monumento, desde a época romana ata o século XXI, a través de diferentes personaxes.
Xa pola noite, ás 21.00 horas, será a quenda de 'Edipo rei', de Sófocles, nunha adaptación de Noite Bohemia que se representará ao pé da Torre. A montaxe foi distinguida co segundo premio de traxedia grega no XVII Concurso Nacional de Teatro Grecolatino de Mérida e conseguiu sete candidaturas nos XI Premios Escenamateur Juan Mayorga das Artes Escénicas.
Viaxe ao Século de Ouro o domingo
A programación continuará o domingo 6 de setembro, entre as 11.30 e as 14.00 horas, cunha nova recreación histórica a cargo de Royal Green Jackets.
Nesta ocasión, o público viaxará ata o Século de Ouro para coñecer os Terzos de Flandres. Haberá un campamento histórico e recreadores vestidos cos uniformes característicos da época, nunha proposta que permitirá descubrir como se organizaba a vida militar, que indumentaria se empregaba e como era o día a día dos soldados.
Con esta iniciativa, o Concello busca reforzar a Torre de Hércules e a súa contorna como espazo para a cultura e a divulgación, combinando patrimonio, historia e ocio nun dos lugares máis recoñecibles da Coruña.