Cultura

Amigos da Ópera da Coruña activará este luns 25 de maio a retirada de localidades para asociados, mentres que o público xeral poderá mercar entradas desde o 3 de xuño

A Asociación de Amigos da Ópera da Coruña inicia este luns 25 de maio a venda de abonos e entradas para os seus socios de cara á nova tempada lírica, coa que a entidade celebrará o seu 74 aniversario. A programación terá como principais atractivos o estreno en Galicia de 'Jenůfa' e o regreso de 'Tosca' ao Palacio da Ópera.

Os asociados poderán retirar as súas localidades ata o venres 29 de maio nas oficinas da entidade, situadas no edificio Atalaya, na avenida do Porto da Coruña, 6. O horario de atención será de 11.00 a 14.00 horas e de 17.00 a 20.00 horas.

A venda organizarase por quendas. Os días 25 e 26 de maio estarán dispoñibles os abonos de socios con butaca asignada no sector A do Palacio da Ópera. O 27 de maio será a quenda dos sectores B, C1 e C2, ademais dos abonos sen butaca asignada, que contarán cun desconto do 40%. O xoves 28 abrirase a venda de entradas soltas para socios, cun desconto directo do 25%, e o venres 29 poderán adquirirse tamén entradas para acompañantes, cunha rebaixa do 10% sobre o prezo de venda ao público.

Durante estes días, os socios tamén poderán reservar o libro-cómic 'Jenůfa', editado pola Asociación xunto con Demo Editorial con motivo da primeira representación desta ópera en Galicia. Os asociados terán acceso a un desconto especial sobre o prezo habitual da publicación.

Para o público xeral, a venda de entradas comezará o mércores 3 de xuño a través de Ataquilla e tamén na praza de Ourense, de luns a venres, en horario de 11.00 a 15.00 horas e de 16.30 a 19.30 horas. Os prezos oscilarán entre os 40 e os 110 euros, segundo a localización escollida no Palacio da Ópera.

A tempada arrincará os días 17 e 19 de setembro, ás 19.00 horas, coa chegada de 'Jenůfa', de Leoš Janáček. A obra presentarase cunha nova produción de Amigos da Ópera da Coruña, en coprodución con Ópera Garage Producciones e baixo a dirección escénica de Emiliano Suárez. Máis de 200 profesionais participarán nesta montaxe, que situará a acción na América dos anos 50 e que coloca a muller, a loita e o perdón no centro do relato.

A dirección musical correrá a cargo de José Miguel Pérez-Sierra, director principal convidado da tempada. No elenco figuran Vanessa Goikoetxea e Eliska Weissová nos papeis de Jenůfa e Kostelnicke, xunto aos tenores Alejandro Roy e Joan Lainez, a mezzosoprano Marianne Cornetti, o barítono coruñés Gabriel Alonso, o baixo barítono Javier Agudo e a mezzosoprano coruñesa Andrea Varela, entre outros intérpretes. A produción contará ademais co Coro Gaos, dirixido por Fernando Briones, e coa Orquestra Sinfónica de Galicia.

O segundo gran título será 'Tosca', que regresará ao Palacio da Ópera os días 22 e 24 de outubro, tamén ás 19.00 horas. Miren Urbieta Vega interpretará o papel protagonista, mentres que Ragga Eldin asumirá o rol de Cavaradossi e Carlos Álvarez volverá á escena coruñesa como Scarpia. A proposta contará coa Orquestra Sinfónica de Galicia, baixo a dirección de Paul-Êmilie Fourny, e cos coros Gaos e Cantabile.

A programación completarase con actividades gratuítas en espazos como o Centro Cívico de Monte Alto, o Fórum Metropolitano, o Circo de Artesáns, a Filmoteca de Galicia, o Museo de Belas Artes da Coruña e Afundación, sempre ata completar aforo.