A tempada de praias arrinca coa izada das tres bandeiras azuis en Miño
Miño xa loce oficialmente as tres bandeiras azuis concedidas este ano ás súas praias. Representantes do goberno local, encabezados polo alcalde, Manuel Vázquez Faraldo, participaron este luns no izado dos distintivos nos areais da Ribeira, Perbes e Praia Grande.
A bandeira azul recoñece a calidade das augas, a seguridade, os servizos dispoñibles e a xestión ambiental das zonas de baño. A presenza deste distintivo nos tres areais reforza a posición de Miño como un dos destinos costeiros de referencia da comarca durante a tempada estival.
A Praia Grande, a da Ribeira e Perbes son tres dos espazos máis concorridos do municipio nos meses de verán, tanto por veciños como por visitantes. A obtención das bandeiras supón tamén un aval para o traballo desenvolvido na conservación e posta a punto dos areais de cara á época de maior afluencia.
Co izado dos distintivos, Miño dá por iniciada unha nova tempada de praias marcada pola aposta pola calidade, a seguridade e o atractivo turístico do seu litoral.