A subdelegación do Goberno acolleu unha xornada sobre a violencia de xénero en estranxeiras
A sede do Goberno na Coruña acolleu esta mañá unha xornada sobre o 'Marco xurídico aplicable ás mulleres estranxeiras vítimas de violencia de xénero' e na que participaron 58 profesionais, representantes de institucións e das Forzas e Corpos de Seguridade do Estado.
A actividade estivo coordinada pola Xefa da Unidade de Violencia de Xénero da Delegación do Goberno, e pola Xefa da Unidade da Subdelegación. O relatorio principal estivo a cargo do xefe da Oficina de Estranxeiría da Subdelegación do Goberno na Coruña, Julio A. Simón Blanco.
Durante a súa intervención, a subdelegada do Gobenro, María Rivas subliñou que “se nos fixamos nas cifras de mulleres estranxeiras vítimas de violencia de xénero, temos activos en VioGén un total de 558 casos que están condicionando a vida de 546 mulleres, e probablemente moitas delas con fillas e fillos ao seu coidado. Polo tanto, unha de cada catro mulleres que hoxe, na provincia da Coruña, precisan dalgún tipo de protección a través do sistema VioGén, son mulleres estranxeiras”.
Estes datos forman parte dos 2.192 casos activos en VioGén na provincia da Coruña, con 2.118 vítimas e 2.123 agresores. A subdelegada recordou que son “2.118 poderosísimas razóns para que traballemos día a día por apoialas, axudalas, protexelas e procurarlles todo aquelo que un Estado de Dereito, que unha sociedade moderna como a nosa, lle debe a calquera das súas concidadáns: seguridade, saúde, traballo, vivenda, dignidade, recoñecemento...”
A subdelegada tamén quixo facer fincapé nas autorizacións de residencias e de traballo concedidas a mulleres estranxeiras vítimas de violencia de xénero, indicando que o seu crecemento é continuado dende o ano 2006 e que “estas cifras tamén nos indican que unha de cada tres autorizacións do total, 915 que se concederon en Galicia, foron resoltas nesta provincia: un total de 398.”
Con todo quixo incidir en que “cando falamos de axudar ás mulleres vítimas de violencia machista, nunca se pode ser compracente co traballo feito, porque sempre queda moito máis por facer”, aínda así recordou que das 188 autorizacións concedidas en toda Galicia no ano 2023, case a metade, 91 o foron na provincia da Coruña.
María Rivas quixo convidar ao traballo conxunto para protexer a estas mulleres, recordando que é “crucial recoñecer e visibilizar a súa especial vulnerabilidade e traballar conxuntamente dende tódolos ámbitos das administracións, para protexelas sen importar a súa orixe ou estatus migratorio, pero sen deixar de recoñecer que este estatus comporta maiores dificultades”.
Finalmente a subdelegada agradeceu a asistencia ás concelleiras e ás responsables dos servizos sociais dos distintos concellos; ao persoal dos centros de información ás mulleres; aos membros das Forzas e Corpos de Seguridade do Estado; e as directoras e directores das diversas áreas da Delegación e da Subdelegación do Goberno.