A subdegada do Goberno na Coruña realizou unha visita institucional ao Concello de Vilasantar
![Imaxe da visista da subdelegada do Goberno a Vilasantar](https://acorunaxa.com/wp-content/uploads/2024/05/Imaxe-da-visista-da-subdelegada-do-Goberno-a-Vilasantar.jpg)
Este mércores 22 de maio a subdelegada do Goberno na Coruña, María Rivas, realizou unha visita institucional ao concello da Vilasantar, onde mantivo un encontro co seu alcalde, Fernando Pérez e membros da corporación municipal e onde tiveron ocasión de repasar os investimentos do Goberno de España neste concello.
Durante a visita, María Rivas quixo poñer en valor os fondos achegados a través do IDAE para a mellora da eficiencia enerxética e aforro no alumeado público do concello e o programa DUS5000 a través do Plan de Recuperación do Goberno. Ambas axudas teñen un importe de 195.657,29 euros e de 315.000 euros, respectivamente que suporán unha mellora na iluminación do municipio e un importante aforro económico nas contas municipais.
O Goberno achega a través do Plan de Recuperación 297.000 euros, para un investimento total de 381.755 euros, para a implementación dun punto limpo, unha instalación que será un referente na economía circular.
Outros dos temas repasados ten que ver coa extensión do programa de banda ancha no concello a través do Plan Único e que actualmente está en execución. Así o plan Único 2022, ten previsto achegar a fibra a 497 vivendas das que xa contan con instalación 321, sendo o nivel de execución é do 64,58% E canto ao Único 2023, están adxudicadas 56 instalacións en vivendas das que se levan acometidas 22, chegando ao 39,28%.
Doutra banda, a subdelegada tamén quixo resaltar as actividades que se desenvolven ao amparo do Pacto de Estado contra a Violencia de Xénero como un exemplo máis da colaboración entre as distintas institucións nesta materia, e polas que o concello de Vilasantar recibiu dende o ano 2018 un total de 23.109,21 euros no marco do Pacto de Estado. A subdelegada resaltou que “son accións de formación, sensibilización e prevención que se realizan a nivel local e que son moi necesarias para avanzar na concienciación social”, que nos achegan a un nivel de colaboración entre administracións imprescindible para loitar contra a violencia de xénero e para contribuír á protección das vítimas.
Na reunión tamén analizaron a situación da intersección da N-634 á altura de Sesmonde na súa intersección coa AC-840. A subdelegada, transmitiulle ao alcalde o compromiso do Goberno con esta infraestrutura e trasladoullelle que está dentro das prioridades do Ministerio de Transportes.
Neste sentido recordou que xa se fixo unha redacción inicial do proxecto que ten que ser retomado coa actualización para un novo proxecto de execución, dentro do marco do novo contrato de servizos de asistencia técnica para a redacción de proxectos de conservación na Demarcación de Carreteiras do Estado en Galicia.
Este novo proxecto será un dos que se poña en marcha proximamente e consistirá en reformar totalmente a intersección para que responda aos parámetros de seguridade que require esa estrada, sendo a súa actuación prioritaria para unha mellor regulación do tráfico.
A subdelegada reiterou o compromiso do Goberno cos concellos máis pequenos e recolleu o sentir do concello en canto á importancia desta infraestrutura para a zona.
Nesta liña, María Rivas subliñou a importancia de que os fondos para a mellora das infraestruturas, ou os do Plan de Recuperación e tamén os do Pacto de Estado contra a violencia de xénero, estean chegando a todos os concellos e especialmente aos máis pequenos. A colaboración institucional é clave para impulsar a mellora dos servizos públicos, as nosas contornas e sobre todo “trátase de garantir que todas as persoas, vivan onde vivan, pero especialmente as que viven nos concellos rurais, teñan un futuro no que conten coas mesmas oportunidades; que a ruralidade non sexa un factor de discriminación senón unha oportunidade ”.