A Sinfónica de Galicia levará ao Palacio da Ópera un espectáculo multimedia sobre eclipses
A Orquestra Sinfónica de Galicia e o CSIC adiantan na Coruña un dos grandes acontecementos astronómicos do ano coa celebración do espectáculo multimedia 'Eclipse Total'. A cita terá lugar o venres 26 de xuño, ás 20.00 horas, no Palacio da Ópera, dentro da programación impulsada polo Concello arredor do eclipse solar do 12 de agosto.
A proposta mestura divulgación científica, música sinfónica e proxeccións visuais de gran formato para achegar ao público o interese dos eclipses solares que poderán observarse en España nos próximos anos. A Coruña terá unha visibilidade privilexiada no fenómeno previsto para agosto, polo que o Concello está a desenvolver diferentes actividades para preparar á cidadanía ante esta cita astronómica.
O concerto estará dirixido por José Trigueros e incluirá obras de Richard Strauss, Joaquín Rodrigo, Dvorák, Claude Debussy, John Estacio e Maurice Ravel. A parte musical irá acompañada de montaxes audiovisuais elaboradas pola organización KV 265, especializada na comunicación científica a través da arte.
As imaxes proxectadas incluirán material astronómico real gravado en Galicia, Asturias e Castela e León durante o verán de 2025 polo artista visual José Francisco Salgado e polo investigador do CSIC Juan Ramón Pardo Carrión, un dos impulsores do proxecto.
Antes do concerto, ás 19.00 horas, celebrarase tamén un encontro no Palacio da Ópera coa participación de especialistas vinculados ao espectáculo. Nel intervirán Juan Ramón Pardo, José Francisco Salgado, o director José Trigueros, a poeta Estíbaliz Espinosa e a investigadora María Balaguer, que achegarán diferentes miradas sobre os eclipses desde a ciencia, a música e a creación artística.
As entradas para 'Eclipse Total' xa están dispoñibles a través das canles oficiais.