A Ruta Cabalar da Viña celebrará a súa novena edición en Irixoa o 15 de agosto
Os afeccionados ao mundo do cabalo teñen unha cita o vindeiro 15 de agosto en Irixoa coa novena edición da Ruta Cabalar da Viña, unha proposta que volverá reunir xinetes e público nunha xornada de convivencia que mestura natureza, gastronomía e música.
A programación arrancará ás 9.30 horas coa recepción dos cabalos no campo da festa da Viña. Media hora despois, ás 10.00 horas, iniciarase a ruta cabalar polos camiños da contorna, unha actividade que cada ano reúne participantes chegados de distintos puntos da comarca.
Ao remate do percorrido, a partir das 13.00 horas, dará comezo a sesión vermú, antes da comida popular prevista para as 15.00 horas. A celebración continuará durante a tarde cun tardeo amenizado por DJ Sam.
O menú inclúe xamón cocido, polbo, churrasco mixto e criollo, ademais de sobremesa, pan, bebida, café e chupito, cun prezo de 35 euros por persoa. Os nenos de ata 6 anos poderán asistir de balde, mentres que os de entre 7 e 11 anos abonarán 18 euros.
A organización lembra que é necesario reservar antes do 10 de agosto e sinala que tamén existe a posibilidade de participar unicamente na comida sen realizar a ruta cabalar. Ademais, durante a xornada celebraranse diferentes sorteos entre os asistentes.
A Ruta Cabalar da Viña consolidouse nos últimos anos como unha das citas estivais para os amantes do mundo ecuestre en Irixoa, combinando a tradición das rutas a cabalo cun ambiente festivo aberto tanto aos participantes como ao público.