A rítmica enche Carral nun certame sen competición e con ampla participación
Carral volveu converterse esta fin de semana nun punto de encontro para a ximnasia rítmica coa celebración do XXIII Certame Municipal, unha cita xa asentada no calendario deportivo local e que reuniu arredor de 250 deportistas nunha intensa xornada de exhibición. O evento desenvolveuse o domingo 19 de abril no pavillón do CEIP Vicente Otero Valcárcel, nun cambio de localización motivado pola ocupación do ximnasio do pavillón municipal do Espiño, escenario habitual noutras edicións.
A principal particularidade desta edición é que o certame mantivo o seu carácter non competitivo, polo que non houbo clasificación xeral nin un club vencedor. A proposta estivo centrada na mostra deportiva e na convivencia entre entidades, nun formato pensado para fomentar a práctica da ximnasia rítmica e reforzar os vínculos entre escolas e clubs participantes.
En total, a cita sumou 78 actuacións e contou coa presenza de oito clubs e escolas da provincia, entre eles o Club de Ximnasia Rítmica de Carral e a Escola Municipal de Ximnasia Rítmica de Carral, ademais doutros conxuntos convidados. O Concello organizou o evento en colaboración co club local, nunha nova mostra do peso que esta disciplina ten no municipio.
A relevancia da rítmica en Carral tamén se reflicte na súa estrutura de base. O club local supera as 60 licenzas federativas e a escola municipal reúne preto de 70 nenas inscritas, cifras que explican a consolidación dun certame que, ano tras ano, segue gañando presenza dentro da programación deportiva da primavera carralesa.