A restauración ecolóxica das ribeiras centra unha proposta do BNG en Betanzos
O BNG de Betanzos presentou unha iniciativa plenaria para impulsar a creación dunha área de restauración ecolóxica nas ribeiras dos ríos e da ría, con especial atención ao ámbito do Carregal, A Ribeira e O Porto. A formación considera que esta zona precisa dunha actuación específica para recuperar os seus valores naturais, ordenar os usos e reducir a vulnerabilidade ante os episodios de asolagamento.
A proposta chega nun contexto no que a recuperación dos ecosistemas degradados gañou peso nas políticas ambientais europeas. O Regulamento 2024/1991 da Unión Europea fixa obxectivos vinculantes para restaurar ecosistemas degradados e pon o foco nos espazos con capacidade para almacenar carbono, mellorar a biodiversidade e reducir o impacto de desastres naturais.
O BNG sostén que os bosques de ribeira e as zonas inundables deben converterse nunha prioridade para Betanzos. A voceira nacionalista, Amelia Sánchez, defende que o impulso do espazo Carregal-Ribeira-Porto permitiría 'protexer a zona, facer propostas a nivel estatal ou mesmo europeo para conseguir fondos para a súa recuperación e desenvolver actuacións que eviten o asolagamento destas áreas'.
A iniciativa tamén propón avanzar nun mapeo detallado da zona fluvial, analizar posibles verteduras e delimitar as chamadas zonas de policía nas marxes do Mendo e do Mandeo. O obxectivo, segundo a formación, é pasar dunha resposta puntual ante cada episodio de enchente a unha planificación ambiental máis estable, con medidas de restauración, prevención e control.
A preocupación polos asolagamentos non é nova no municipio. Nos últimos meses, Betanzos rexistrou episodios de desbordamento do Mendo e do Mandeo que afectaron a zonas como O Porto, A Ribeira, O Carregal, O Pasatempo e o paseo da Tolerancia, coincidindo con choivas intensas, aumento do caudal e subida da marea.
A proposta do BNG abre ademais o debate sobre a figura de protección máis acaída. A lexislación galega contempla os espazos naturais de interese local para ámbitos que, polas súas singularidades, merezan protección a nivel municipal, aínda que estes non poden declararse cando xa estean incluídos noutras categorías da Rede galega de espazos protexidos.
Para Amelia Sánchez, Betanzos conta cun patrimonio natural que debe recibir a mesma atención que o seu valor histórico, cultural e arquitectónico. A formación defenderá no Pleno que a recuperación ecolóxica das ribeiras pode converterse nunha ferramenta para captar financiamento, mellorar a xestión da contorna fluvial e reforzar a protección dunha das áreas máis sensibles do municipio.