A Reserva da Biosfera contará cunha nova rede de recarga para vehículos eléctricos
A Reserva da Biosfera Mariñas Coruñesas aposta pola sostibilidade coa adxudicación da creación dunha nova rede de recarga para vehículos eléctricos que estará presente nos 17 municipios que forman parte deste territorio. O proxecto, cun investimento de 145.200 euros, será executado pola empresa Iberdrola, que garante que o 100% da enerxía utilizada terá orixe renovable, contribuíndo así a un modelo de mobilidade máis respectuoso co medio ambiente.
O presidente da Reserva, José Antonio Santiso, destacou que esta Rede Eco da Biosfera representa "unha infraestrutura inclusiva e accesible" que permitirá avanzar cara a "un transporte máis sostible" e servirá como atractivo para visitantes interesados nun turismo neutro en carbono.
O proxecto contempla a instalación de 23 cargadores que darán servizo a 46 prazas de aparcamento, incluíndo espazos adaptados para persoas con mobilidade reducida. Ademais, a empresa adxudicataria comprométese a investir 8.000 euros anuais en iniciativas de mellora ambiental no territorio, como accións de compensación da pegada de carbono, recuperación de ecosistemas ou apoio ao desenvolvemento rural.
A iniciativa enmárcase no Plan de Sustentabilidade Turística da Reserva, financiado a través dos fondos europeos Next Generation, e pretende fomentar a cohesión territorial ao levar puntos de recarga a municipios rurais onde, en moitos casos, será o primeiro ou segundo punto dispoñible. A instalación estará operativa antes do 1 de decembro de 2025, fortalecendo así a infraestrutura para o uso de vehículos eléctricos no rural galego.