A realidade virtual mergulla a máis de 500 escolares no medio mariño galego
Máis de 500 escolares da provincia achegáronse á riqueza dos fondos mariños galegos sen saír da aula grazas ao programa de educación ambiental 'Un mar de cambios', impulsado pola Deputación da Coruña. A iniciativa vén de rematar tras desenvolver 13 obradoiros prácticos en dez centros educativos, cunha participación total de 513 alumnas e alumnos de 3º a 6º de primaria.
O proxecto combinou explicacións divulgativas, debate nas aulas e experiencias inmersivas con lentes de realidade virtual. O obxectivo foi amosar ao alumnado a biodiversidade das rías e dos océanos, así como os efectos que o cambio climático está a provocar nos ecosistemas mariños.
Durante as sesións, os escolares traballaron con imaxes reais filmadas no litoral galego para identificar cambios nos fondos mariños, coñecer especies vulnerables e reflexionar sobre a importancia de protexer a vida baixo a auga. Tamén participaron en dinámicas nas que propuxeron hábitos e accións cotiás para contribuír ao coidado do mar.
A parte máis visual dos obradoiros chegou coas experiencias en 360 graos, que permitiron ao alumnado mergullarse de maneira virtual nos fondos mariños galegos. A actividade completouse cun bloque específico sobre especies ameazadas, pensado para explicar a súa situación e a necesidade de conservar os seus hábitats.
A deputada de Medio Ambiente, Rosa Ana García López, destacou que coñecer o mar é o primeiro paso para valoralo e protexelo. Tamén subliñou que a realidade virtual permite achegar ás aulas unha experiencia máis directa, atractiva e comprensible para os nenos e nenas.
No programa participaron centros da Laracha, Moeche, Ares, Oleiros, Arteixo, Camariñas, Curtis, Brión, Santa Comba e Porto do Son. Entre eles estiveron o CEIP Luís Seoane de Oleiros, o CEIP Arteixo e o CEIP de Teixeiro, en Curtis.