A presión sobre a Xunta medra polo mal estado do comedor do colexio de Santa Cruz
O Concello de Oleiros volveu reclamar con urxencia a reforma do comedor do CEIP Isidro Parga Pondal, en Santa Cruz, ao considerar insostible o estado no que se atopa este espazo escolar. O goberno local denuncia que, malia os compromisos adquiridos pola Xunta de Galicia para acometer as obras durante o pasado verán, a actuación continúa sen levarse a cabo.
Segundo traslada a administración municipal, o comedor presenta un aspecto moi deteriorado, con paredes en mal estado, humidades e filtracións de auga que, ao seu xuízo, fan imprescindible unha intervención inmediata. O Concello advirte de que non se pode permitir que un centro público manteña instalacións nestas condicións, especialmente nunha zona destinada ao uso diario dos nenos e nenas.
Ante esta situación, o alcalde remitiu un escrito ao conselleiro de Educación para informalo do problema e reclamarlle a execución inmediata das obras. A demanda súmase ás reiteradas peticións realizadas nos últimos meses tanto polo propio Concello como pola ANPA do centro.
Desde o goberno local lembran ademais que o Concello segue asumindo melloras nos colexios do municipio para atender as necesidades trasladadas polas direccións e polas familias. No caso do CEIP Isidro Parga Pondal, este curso financiou a renovación do solo das aulas de infantil, unha intervención que, segundo subliña, correspondía á Xunta, pero que o executivo municipal decidiu afrontar para mellorar as condicións do alumnado.
A estas actuacións engádense tamén a renovación da pista polideportiva e outras melloras realizadas nas zonas verdes do recinto escolar. Con todo, o Concello insiste en que a reforma do comedor non pode continuar á espera e reclama á Xunta que actúe sen máis demora.