A Praia Grande de Miño recupera area tras os temporais cunha actuación clave para frear a erosión
A Praia Grande de Miño está a ser escenario esta semana dunha actuación de rexeneración impulsada pola Demarcación de Costas do Estado co obxectivo de recuperar a area perdida durante os temporais do inverno e mellorar a estabilidade dun dos areais máis emblemáticos da comarca.
Os traballos, que se prolongarán ata o venres coincidindo coas mareas baixas, consisten no traslado de area desde zonas nas que existe unha maior acumulación, situadas na desembocadura e na punta da ría do Baxoi, cara ao extremo sur da praia, unha das áreas máis vulnerables á erosión. A actuación lévase a cabo en coordinación coa Confraría local e permitirá reforzar o perfil do areal de cara á campaña de verán.
Segundo informou o Concello de Miño, a intervención tivo que agardar a esta época do ano porque agora a praia presenta un perfil máis estable. Ademais, as mareas vivas permiten executar os traballos mediante maquinaria terrestre sen provocar afeccións significativas ao ecosistema costeiro.
A actuación forma parte dun plan de conservación promovido por Costas para mellorar a resistencia do litoral fronte aos episodios de forte ondada e aos procesos de erosión que afectan periodicamente á Praia Grande. A previsión é mover arredor de 2.500 metros cúbicos de area, unha medida que contribuirá a incrementar a reserva sedimentaria e a ampliar a superficie seca do areal nas zonas máis próximas ao núcleo urbano.
A Praia Grande, con máis de 1,4 quilómetros de lonxitude e situada na contorna das marismas do río Baxoi, conta cun importante sistema dunar que desempeña unha función esencial na protección da costa e na conservación da biodiversidade local. O espazo alberga hábitats de interese comunitario e constitúe un dos principais atractivos turísticos do municipio.
Desde o Concello lamentan as molestias que estas obras poidan ocasionar aos usuarios durante os próximos días, aínda que subliñan que se trata dunha actuación imprescindible para garantir a conservación do areal e a boa saúde do seu ecosistema nun momento especialmente importante, ás portas da tempada alta de visitantes.