A posible clausura de Riazor tras o ascenso do Dépor provoca críticas na cidade
A proposta da Comisión Antiviolencia de pechar o estadio de Riazor durante un mes e impoñer unha sanción de 80.000 euros ao Deportivo abriu unha nova fronte política na cidade tras a celebración do ascenso a Primeira División.
A resolución refírese aos feitos ocorridos o pasado 31 de maio, ao remate do encontro ante a UD Las Palmas. Segundo Antiviolencia, produciuse unha invasión masiva do terreo de xogo, activáronse artefactos pirotécnicos, arrincáronse anacos de céspede e retiráronse asentos da bancada, actuacións que, segundo o informe de seguridade, xeraron situacións de risco e danos nas instalacións. Tamén se sinala o voo non autorizado dun dron no estadio e a celebración dalgúns xogadores con bandeiras vinculadas a Riazor Blues, grupo considerado violento pola propia Comisión.
A proposta non é firme e agora abrirase o correspondente procedemento, no que o club poderá presentar alegacións antes de que exista unha resolución definitiva. O Deportivo xa condenara os actos vandálicos producidos durante a celebración, aínda que tamén puxo en valor o comportamento maioritario dunha afección que cualificou como determinante no regreso do equipo á máxima categoría.
Desde o BNG, a portavoz municipal Avia Veira cualificou de 'desproporcionada' a proposta de sanción. A nacionalista defendeu que a celebración non tivo carácter violento e que naceu do sentimento deportivista dunha afección que quixo compartir co equipo un momento histórico. Veira agarda que Antiviolencia teña en conta as alegacións que se presenten.
A alcaldesa, Inés Rey, tamén considerou excesiva a medida e defendeu o comportamento xeral da bancada de Riazor, destacando que a celebración se desenvolveu nun ambiente maioritariamente festivo e pacífico. O PP local expresou igualmente a súa confianza en que as alegacións permitan revisar a proposta inicial.
De confirmarse, a sanción podería afectar ao regreso do Deportivo a Primeira División, xa que obrigaría ao club a disputar partidos sen público en Riazor durante o período de clausura. A medida tamén podería ter consecuencias para outros equipos que utilizan o estadio, como o Deportivo Abanca ou o Fabril.