A piscina exterior de Betanzos abrirá o 1 de xullo para iniciar o programa de verán
Betanzos abrirá o vindeiro mércores, 1 de xullo, a piscina municipal descuberta, que prestará servizo durante os meses de xullo e agosto. Se o bo tempo continúa en setembro, as instalacións poderán permanecer abertas ata o inicio do curso escolar.
O horario será de 12.00 a 20.00 horas, de luns a domingo. A entrada custará 1 euro para menores de 18 anos e 2 euros para persoas adultas, ata completar a capacidade máxima.
A apertura da piscina forma parte da programación estival organizada polo Concello, que inclúe propostas deportivas, culturais e de lecer para diferentes idades.
Dentro deste programa tamén se puxeron en marcha os campamentos municipais, nos que participan este ano 180 nenos e nenas. A actividade ampliou tanto o número de prazas como o horario, que será de 08.00 a 15.00 horas.
Os campamentos están dirixidos a menores de entre 3 e 12 anos e desenvólvense no Aulario de Infantil do CEIP Francisco Vales Villamarín ata o 14 de agosto, repartidos en tres quendas.
Durante o verán, os participantes realizarán actividades deportivas, artísticas, musicais, de danza e audiovisuais, ademais de saídas polo municipio e visitas a espazos naturais, praias da comarca das Mariñas e outros lugares de interese.