A oferta de vivendas da Xunta non despexa as dúbidas das familias afectadas en Monte Mero
A reunión celebrada este mércores, 25 de marzo, entre a Xunta e as persoas afectadas polas expropiacións do PIA de Monte Mero deixou sobre a mesa unha primeira oferta oficial, pero non logrou pechar a incerteza da veciñanza. O Goberno galego trasladou que os propietarios de vivendas destinadas a residencia habitual e permanente poderán escoller entre unha vivenda de reemprazo, que será construída pola propia administración, ou a valoración económica do inmoble. Pola súa banda, os veciños saíron do encontro coa sensación de que seguen sen resposta algunhas das cuestións que consideran clave.
Segundo a información facilitada pola Xunta tras a reunión, a alternativa habitacional poderá materializarse en vivenda colectiva ou unifamiliar, nunha zona reservada dentro do propio ámbito de actuación. Ademais, nos próximos días requirirase aos propietarios a documentación que acredite a titularidade e, no seu caso, a residencia habitual nas vivendas. Despois, técnicos do Instituto Galego da Vivenda e Solo visitarán cada edificación afectada para realizar a súa taxación e valoración.
Ese foi o marco oficial exposto pola administración autonómica para un proxecto que prevé máis de 4.000 novas vivendas, a maioría protexidas, no ámbito de Monte Mero. Porén, a versión da veciñanza insiste en que a proposta segue sen aterrar sobre a realidade das familias que viven na zona.
A Asociación de Veciños de Pedralonga explicou tras o encontro que un dos principais atrancos está en que a Xunta computa unha construción como unha única vivenda expropiable, cando en moitos casos dentro dese mesmo inmoble conviven varias familias sen división horizontal feita. Segundo relatou, hai casas con baixo, primeiro e segundo ocupados por distintos membros dunha mesma familia ou por unidades familiares diferentes, e a solución exposta pola Xunta non aclara que ocorrerá neses supostos.
Esa é, precisamente, unha das maiores preocupacións da veciñanza. Os afectados sosteñen que non se pode falar de realoxo 'casa por casa' se despois se ofrece unha única vivenda para unha construción na que residen dúas ou tres familias distintas. A asociación asegura que iso deixaría persoas sen encaixe claro na proposta e advirte de que os casos teñen que analizarse por familias e non só por inmobles.
Outro dos puntos de fricción foi o solo. Segundo os veciños, durante a reunión a Xunta evitou entrar a fondo na cuestión dos terreos e centrouse unicamente nas vivendas. A asociación mantén que aí reside boa parte do conflito, xa que moitas familias non só temen perder a casa, senón tamén parcelas e fincas anexas polas que consideran que non se lles está dando unha resposta suficiente.
A maiores, a asociación veciñal expón que a proposta presentada abre interrogantes sobre os gastos que poderían asumir os afectados e sobre as limitacións que acompañarían ás novas vivendas, ademais de deixar sen aclarar como se resolverán os desacordos entre copropietarios ou entre familiares que prefiran solucións distintas, ben sexa unha nova casa ou a compensación económica.
Pese a todo, os veciños aseguran que non rexeitan a construción de vivenda pública no ámbito. O que reclaman é que ese desenvolvemento non se faga á costa de deixar atrás ás familias que levan décadas vivindo en Monte Mero. A sensación coa que saíron da xuntanza é que a reunión serviu para abrir unha vía de diálogo, pero non para deixalos tranquilos nin para pechar un acordo real.
Nos próximos días, o proceso entrará nunha fase máis concreta coa petición de documentación e as visitas técnicas ás vivendas. Será entón cando a proposta da Xunta comece a medirse caso por caso e cando se vexa se a oferta de reemprazo consegue reducir a tensión ou, pola contra, alimenta aínda máis o conflito aberto en Monte Mero.