A nova escola infantil de Xarío abrirá o vindeiro curso con 43 prazas en Miño
A nova escola infantil municipal de Xarío, en Miño, comezará a funcionar no curso 2026-2027 e permitirá ampliar a oferta pública de atención á primeira infancia no municipio. A delegada da Xunta na Coruña, Belén do Campo, visitou este venres as instalacións e destacou o papel do Goberno galego no impulso de novas prazas de 0 a 3 anos e nas políticas de conciliación.
O proxecto contou cunha achega autonómica de 265.000 euros procedentes dos fondos europeos do Mecanismo de Recuperación e Resiliencia, tramitados pola Xunta. Este financiamento permitiu rehabilitar de forma integral a antiga escola unitaria de Xarío e adaptala ás necesidades educativas dos nenos e nenas máis pequenos.
O novo centro disporá de tres aulas, cada unha delas con patio exterior propio, ademais de comedor e unha ampla zona verde para actividades ao aire libre. A súa apertura sumará 43 novas prazas á rede municipal, que actualmente conta con 76 na escola infantil A Ceboliña.
Do Campo lembrou que esas 76 prazas xa están financiadas pola Xunta durante este curso 2025-2026 cunha achega próxima aos 92.000 euros, o que permite a súa gratuidade para as familias. A posta en marcha da escola de Xarío implicará tamén unha nova achega anual para garantir a gratuidade das súas prazas.
A representante autonómica enmarcou a actuación na aposta da Xunta pola educación infantil e pola conciliación, e lembrou que Galicia mantén a gratuidade universal das escolas infantís durante oito horas ao día e once meses ao ano.